Një arritje me rëndësi historike sapo është regjistruar në fushën e fizikës kuantike. Një ekip studiuesish nga Universiteti i Shtutgartit ka realizuar për herë të parë transferimin kuantik të informacionit midis fotoneve të gjeneruar nga burime të ndryshme, të lidhura përmes një fibre optike 10 metra të gjatë. Eksperimenti konfirmoi se teleportimi kuantik – pra, transferimi i gjendjeve kuantike pa transport fizik të grimcave – mund të kryhet pa humbje informacioni dhe pa ndërprerje, duke hapur rrugën për lidhje komunikimi ultra të sigurta dhe rrjete kuantike të së ardhmes.
Rezultati, i publikuar në revistën prestigjioze Nature Communications, përfaqëson një hap të madh drejt ndërtimit të një internet-i kuantik, ku të dhënat transmetohen në mënyrë të padukshme dhe të pacënueshme për çdo formë ndërhyrjeje apo hakёrimi.
Arritja lidhet drejtpërdrejt me punën që në vitin 2022 u vlerësua me Çmimin Nobel në Fizikë, i dhënë për kërkime pioniere në fushën e informacionit kuantik. Alain Aspect, John F. Clauser dhe Anton Zeilinger u nderuan për eksperimentet që provuan realitetin e fenomenit të quajtur ngatërresë kuantike – një formë lidhjeje midis grimcave që mbetet e pandashme edhe kur ato janë të ndara në distanca të mëdha.
Pikërisht falë këtij fenomeni, shkencëtarët po ndërtojnë bazat për gjeneratën tjetër të teknologjisë: kompjuterë kuantikë mijëra herë më të shpejtë, matje me saktësi ekstreme dhe sisteme enkriptimi praktikisht të pathyeshme.
Me suksesin e fundit eksperimental, vizioni i rrjetit kuantik global – një ditë i imagjinuar vetëm në teoritë më të guximshme – duket më afër se kurrë.
(Burimi: Tgcom)
