Katy Perry dhe ish-kryeministri kanadez Justin Trudeau duket se po hedhin hapa të rëndësishëm në marrëdhënien e tyre të re. Sipas revistës People, këngëtarja 41-vjeçare dhe politikani 53-vjeçar po planifikojnë të kalojnë së bashku festat e fundvitit, ndërsa janë afruar ndjeshëm gjatë muajve të fundit. Një burim i brendshëm u shpreh se Perry mezi pret përfundimin e turneut të saj botëror “Lifetimes”, i cili ka qenë mjaft sfidues: “Pa ekzagjerim, ky vit ka qenë një vorbull për të. Ajo nuk ka pasur kohë të mendojë seriozisht për jetën pas turneut.”
Ndërkohë, këngëtarja do të përqendrohet te vajza e saj 4-vjeçare, Daisy Dove Bloom, të cilën e ka me ish-partnerin Orlando Bloom. “Ajo është një nënë beqare tani dhe shumë gjëra do të marrin formë rreth këtij realiteti vitin e ardhshëm,” theksoi burimi. As përfaqësuesit e Perry-t dhe Trudeau-t nuk kanë dhënë ndonjë koment mbi lajmet e fundit.
Sa i përket planeve të Trudeau-s për festat, ato mbeten të paqarta, përfshirë nëse ai do të kalojë kohë me ish-bashkëshorten e tij, Sophie Grégoire, dhe tre fëmijët e tyre, Xavier James, Hadrien Grégoire dhe Ella-Grace. Në fillim të kësaj jave, Sophie reagoi për herë të parë ndaj romancës së përfolur të ish-bashkëshortit, duke pranuar se ekspozimi publik ka pasur ndikim emocional tek ajo. “Ne jemi njerëzorë dhe gjërat na prekin,” tha ajo në podkastin “Arlene is Alone”. “Është normale të ndihesh kështu… çështja është se si zgjedh të reagosh. Unë përpiqem të dëgjoj muzikën, jo zhurmën.”
Dyshja duket se kanë konfirmuar romancën muajin e kaluar, kur Perry gjatë një koncerti në Pragë pranoi para publikut se “po del me dikë”, ndërsa hodhi poshtë në skenë një propozim të inskenuar për martesë. Pak ditë më parë, Perry dhe Trudeau u shfaqën për herë të parë publikisht si çift në kabarenë “Crazy Horse” në Paris, duke festuar ditëlindjen e saj të 41-të.
Një burim për Page Six pohoi se Trudeau është “shumë i lumtur” në marrëdhënien e tij të re: “Ai është i çmendur pas saj dhe e konsideron gruan perfekte. Ata kanë kimi në çdo gjë — nga politika, te fëmijët e deri te ushqimi francez. Kanë një shkëlqim të ndërsjellë.”
Thashethemet filluan në korrik, kur dyshja u pa duke darkuar në restorantin elegant Le Violon në Montreal, e më pas u fotografuan në momente intime në jaht pranë Santa Barbarës, Kaliforni, në tetor.
(Burimi: Page Six)
