Presidenti amerikan Donald Trump kërkon që lufta mes Ukrainës dhe Rusisë të përfundojë sa më shpejt, ndërsa konfirmoi se plani i shumëpërfolur i paqes me 28 pika nuk është versioni përfundimtar. Duke folur për gazetarët jashtë Shtëpisë së Bardhë të shtunën mbrëma, Trump deklaroi se konflikti nuk do të kishte nisur kurrë nëse ai do të ishte president dhe se është jetike që zgjidhja të arrihet tani. “Do të doja të arrija paqen. Duhet të kishte ndodhur shumë kohë më parë. Lufta e Ukrainës me Rusinë nuk duhet të kishte ndodhur kurrë. Nëse do të isha president, nuk do të kishte ndodhur kurrë. Në një mënyrë ose në një tjetër, duhet ta përfundojmë”, u shpreh ai.
Deklaratat e Trump vijnë ndërsa udhëheqësit evropianë kanë shprehur shqetësime serioze për detajet e planit të paqes, i cili raportohet se është negociuar mes përfaqësuesve të SHBA-ve dhe Rusisë pa përfshirë Ukrainën dhe aleatët e saj. Plani parashikon që Ukraina të kufizojë forcat e saj të armatosura, të heqë dorë nga territore strategjike dhe të braktisë rrugën drejt anëtarësimit në NATO, ndërsa vendi do të duhej të organizonte zgjedhje brenda 100 ditëve. Në këmbim, sanksionet ekonomike kundër Rusisë do të hiqeshin dhe Moska do të riintegrohej në ekonominë globale — një element tepër i rëndësishëm për Vladimir Putinin.
Burimet nga Downing Street konfirmuan se Kryeministri britanik Starmer ka biseduar me Presidentin ukrainas Volodymyr Zelensky lidhur me propozimin dhe se gjatë Samitit të G20 në Johanesburg, ai dhe liderë të tjerë evropianë kanë ngritur shqetësime të forta mbi pasojat e këtij dokumenti. Starmer ka konfirmuar gjithashtu se ekipi i tij dhe ai i Trump do të punojnë së bashku mbi propozimin për paqe, gjatë takimeve që do të mbahen në Gjenevë. Në një deklaratë për mediat, ai theksoi se aleatët janë të bashkuar në qëndrimin se Ukraina duhet të jetë në gjendje të mbrohet edhe nëse nënshkruhet armëpushimi. “Jemi të shqetësuar për kufizimin e numrit të ushtarëve, sepse është thelbësore që Ukraina të jetë në gjendje të mbrohet. Ka elementë në planin me 28 pika që janë thelbësorë për paqen e qëndrueshme, por kjo kërkon punë shtesë”, u shpreh Starmer.
Nga ana tjetër, Vladimir Putin është treguar optimist duke deklaruar se marrëveshja mund të shërbejë si bazë për një zgjidhje përfundimtare, ndërsa Presidenti Zelensky po kërkon alternativa që të mos cenojnë sovranitetin dhe integritetin territorial të Ukrainës. Trump fillimisht kishte sinjalizuar se priste përgjigje nga Kievi deri të enjten, por më vonë deklaroi se ka hapësirë për negociata në Gjenevë.
Ndërkohë, në Zvicër pritet të nisë raundi i parë i bisedimeve teknike, ku këshilltarë të sigurisë nga SHBA, Ukraina dhe vendet evropiane do të shqyrtojnë me detaje propozimin e paqes. Zyrtarë të lartë të BE-së ndërkohë kanë paralajmëruar se asnjë marrëveshje nuk do të pranohet përmes presionit ndaj Kievit dhe se Europa nuk do të mbështesë asnjë formulim që detyron Ukrainën të dorëzojë territor.
Me presionin që rritet nga të gjitha anët, ditët e ardhshme mund të jenë vendimtare për fatin e një lufte që ka tronditur botën për gati tre vjet.
(Burimi: Daily Mail)
