Takimi i parë ballë për ballë mes Jake Paul dhe Anthony Joshua në Miami të premten ka bërë xhiron e rrjetit, për shkak të kontrastit tё pakrahasueshёm fizik mes dy boksierëve, një imazh që ka ndezur debate të mëdha në komunitetin e boksit dhe në rrjetet sociale. Ylli i rrjeteve sociale Jake Paul, i kthyer në boksier profesionist, dukej shume i vogël përballë Anthony Joshua-s, ish-kampionit të dyfishtë botëror të peshave të rënda, që e dominoi totalisht me fizikun e tij.
Në eventin zyrtar të prezantimit të duelit që do të mbahet më 19 dhjetor në Kaseya Center, Miami, tё gjithё u habitёn nga diferenca e madhe fizike: Anthony Joshua 1.98 metra i gjatë dhe historikisht rreth 250 paund (113 kg), përballë Jake Paul 1.85 metra me peshë tipike rreth 200 paund (90 kg). Sipas rregullave të ndeshjes, Joshua do të kufizohet në maksimum 245 paund ose 111 kg, por diferenca pёrsёri mbetet e madhe për një duel të tillë.
Fotot e momentit kur të dy boksierët shikohen në sy janë bërë virale, ku Joshua qëndronte i palëvizshëm dhe imponues, ndërsa Paul dukej si një sportist i një kategorie krejt tjetër.
Megjithatë, Jake Paul-i ka bindjen se mund të bejë një nga surprizat më të mëdha të boksit modern, madje duke pretenduar se do e hedhё Joshuan nё nokaut në raundin e pestë, ashtu si Buster Douglas hodhi nё tapet Mike Tyson-in në vitin 1990.
“Jam këtu të trondis botën. Askush nuk mendon se unё do të fitoj — dhe kjo më pëlqen,” deklaroi Paul, duke shtuar se shpejtësia, jo pёrmasa, do të bëjë diferencën.
Nga ana tjetër, Joshua, i rikthyer pas humbjes së tij në shtator 2024 ndaj Daniel Dubois dhe pas një operacioni në bërryl, e pranoi se gjithçka pёrveҫ nokautit të shpejtë do të konsiderohet njё dështim pёr tё.
Në një moment që tashmë është kthyer në meme sportive, Joshua i tha Paulit:
“Do tё tё bёj pёrshesh — se ky është sporti ynë.”
Dueli konsiderohet tashmë si një ndër eventet më të diskutuar të vitit dhe vetëm dallimi fizik mes dy rivalёve ka mjaftuar që bota e boksit ta presё kёtё ndeshje me “frymën pezull”.
