Një nga barrierat më të mëdha që ndante botën Android nga ajo e Apple sapo u rrëzua. Sipas njoftimit të Google në blogun zyrtar, tani është e mundur të shkëmbehen skedarë — madje edhe shumë të mëdhenj — midis një telefoni të serisë Pixel 10 dhe një iPhone-i, iPad-i ose kompjuteri Mac, si në dërgim ashtu edhe në marrje. Kompania ka premtuar se funksioni do të zgjerohet së shpejti për të gjitha pajisjet Android, duke çuar drejt një epoke të re komunikimi pa kufij mes dy sistemeve tradicionale rivale.
Praktikisht, mbështetja për AirDrop-in e Apple tashmë është integruar brenda menusë Quick Share, mjeti i transferimit të skedarëve të Google. Deri më sot, përdoruesit mund të ndanin skedarë vetëm brenda të njëjtit sistem operativ dhe ishin të detyruar të përdornin aplikacione ndërmjetëse kur donin të kalonin dokumente midis pajisjeve Android dhe Apple. Tani, thjesht duke zgjedhur opsionin e dërgimit, Quick Share dhe AirDrop “njohin” njëri-tjetrin automatikisht, duke bërë të lehtë transferimin e fotove, videove dhe dokumenteve në të dy drejtimet.
“Ne e ndërtuam këtë zgjidhje duke vendosur sigurinë në qendër,” shkruan Google në deklaratën zyrtare. “Të dhënat tuaja mbrohen me protokolle të fuqishme sigurie, të testuara nga ekspertë të pavarur. Kjo është një mënyrë tjetër se si po përmirësojmë përputhshmërinë mes sistemeve.” Google thekson se përdoruesit e Pixel 10 duhet të sigurohen që Quick Share tё jetё vёnё në opsionin “të gjitha për 10 minuta” ose “prano”, për të lejuar lidhjen direkte me pajisjet Apple.
Megjithatë, ekspertët paralajmërojnë se kjo lëvizje mund të sjellë tensione të reja mes dy gjigantëve. Sipas tyre, Apple mund të vendosë të bllokojë përputhshmërinë e AirDrop-it me Android, duke e konsideruar si “rrezik sigurie” dhe duke lëshuar një përditësim të ri softuerik që mund të prishë funksionimin e Google. Për momentin, të dy ekosistemet komunikojnë më mirë se kurrë më parë, por mbetet për t’u parë nëse ky bashkëpunim teknologjik do të vazhdojë pa pengesa.
(Burimi: ANSA)
