Irani ka vendosur të bojkotojë shortin e Kupës së Botës 2026 që do të mbahet në Uashington javën e ardhshme, sepse SHBA-të u kanë refuzuar vizat anëtarëve të delegacionit të saj, raportoi të premten agjencia shtetërore e lajmeve IRNA.
Agjencia citoi zëdhënësin e Federatës Iraniane të Futbollit, Amir-Mahdi Alavi, të ketë thënë se zyrtarët përballen me pengesa në marrjen e vizave që shkojnë përtej konsideratave sportive.
Alavi tha se federata i ishte drejtuar FIFA-s dhe shpresonte që kjo të ndihmonte në zgjidhjen e çështjes. Organi qeverisës i futbollit nuk iu përgjigj menjëherë një kërkese për koment.
Administrata e Presidentit Donald Trump njoftoi në qershor një ndalim udhëtimi për qytetarët nga 12 vende, përfshirë Iranin. Lista përfshinte edhe Haitin, i cili javën e kaluar u kualifikua për Kupën e Botës.
Megjithatë, u premtuan përjashtime për “çdo atlet ose anëtar të një ekipi atletik, duke përfshirë trajnerët, personat që kryejnë një rol mbështetës të domosdoshëm dhe të afërmit e ngushtë, që udhëtojnë për Kupën e Botës, Lojërat Olimpike ose ndonjë ngjarje tjetër të madhe sportive, siç përcaktohet nga sekretari i shtetit”.
Nuk është e qartë nëse përjashtimet vlejnë edhe për shortin e Kupës së Botës, i cili zhvillohet më 5 dhjetor në Qendrën Kennedy.
Delegacioni iranian pritej të udhëhiqej nga presidenti i federatës së futbollit, Mehdi Taj, një nga zyrtarët më të lartë në futbollin aziatik dhe anëtar i dy komiteteve të FIFA-s që mbikëqyrin Kupën e Botës.
Ai është një nga nënkryetarët e Konfederatës Aziatike të Futbollit dhe anëtar i paneleve të FIFA-s me përgjegjësi për garat e organit qeverisës, plus futbollin e ekipit kombëtar të meshkujve në përgjithësi.
Një numër rekord prej 48 ekipesh do të marrin pjesë në Kupën e Botës që do të zhvillohet nga 11 qershori deri më 19 korrik, e cila do të organizohet së bashku nga SHBA-të, Kanadaja dhe Meksika.
(Pёrshtatur nga CNN)
