Ben Affleck ka kaluar Ditën e Falënderimeve së bashku me ish-bashkëshorten Jennifer Garner dhe fëmijët e tyre, në Los Angeles, duke treguar edhe një herë marrëdhënien e mirë familjare që kanë krijuar pavarësisht divorcit. Fotot e publikuara të enjten treguan aktorin duke mbërritur në shtëpinë e Garner me djalin e tyre Samuel dhe me nënën e tij, Chris Boldt.
Çifti i dikurshëm, i cili është divorcuar në vitin 2018, vazhdon të bashkëpunojë ngushtë në rritjen e fëmijëve. Një burim i cituar nga People deklaroi se takimi i tyre për festën e Falënderimeve u zhvillua “ashtu si vitin e kaluar” dhe se atmosfera ishte miqësore.
“Ben dhe nëna e tij u bashkuan. Jen e bën shumë të veçantë festën — ajo është një kuzhiniere e shkëlqyer,” tha burimi për revistën.
Sipas të njëjtit burim, Garner “do që e gjithë familja të jetë së bashku” dhe Affleck është gjithmonë i mirëpritur në shtëpinë e saj. Burimi shtoi se aktorja ka qenë mbështetëse e vazhdueshme e Affleck edhe pas ndarjes së bujshme në vitin 2015: “Jen është mbështetësja e tij më e madhe. U deshën vite për të arritur në këtë pikë, por ajo nuk hoqi dorë kurrë prej tij. Tani gjithçka është miqësore dhe e përqendruar te fëmijët.”
Jennifer Garner ka një marrëdhënie të qëndrueshme me partnerin e saj, John Miller, drejtor ekzekutiv i CaliBurger, me të cilin është e lidhur që nga viti 2018. Sipas burimit të People, ai ka qenë “jashtëzakonisht i durueshëm dhe mirëkuptues” për prioritetet familjare të Garner dhe aktorja është “e lumtur” në këtë raport.
Muajin e kaluar, Affleck foli pozitivisht për bashkëpunimin si prindër në premierën e filmit “Kiss of the Spider Woman” në New York. “Jam shumë me fat që kam një partnere të shkëlqyer dhe fëmijë të mrekullueshëm,” u shpreh ai për Access Hollywood. “Nuk mund të jem më krenar. Është gëzimi i jetës sime dhe jam vërtet shumë me fat.”
Affleck dhe Garner u martuan në vitin 2005 dhe kanë tre fëmijë: Violet (19 vjeç), Seraphina (16 vjeç) dhe Samuel (13 vjeç).
Ndërkohë, sipas Daily Mail, marrëdhënia e Affleck me fituesen e çmimit Grammy, Jennifer Lopez, mendohet se ka përfunduar, pavarësisht një paraqitjeje të përbashkët të dyshes në premierën e filmit.
(Burimi: Daily Mail / People / Access Hollywood)
