Një fermer francez i specializuar në mbarështimin e kërmijve gastronomikë ka përjetuar një goditje të rëndë financiare pasi afro 450 kilogramë kërmij iu vodhën gjatë natës — një sasi me vlerë më shumë se 100,000 dollarë, raportoi CNN, duke iu referuar mediave franceze.
Ferma familjare L’Escargot Des Grands Crus, e ndodhur në Bouzy, në verilindje të Francës, publikoi lajmin në një postim në Facebook, ku njoftoi se stoku i kërmijve të freskët dhe të ngrirë ishte zhdukur plotësisht.
“Ky nuk është vërtet postimi që menduam të shkruanim kur afrohen festat,” shkroi kompania. “Ne ishim viktima të një vjedhjeje dhe stoku ynë u vodh.”
Sipas mediave lokale, hajdutët prenë gardhin dhe hynë në magazinat e fermës pa u zbuluar, duke marrë kërmijtë që ndodheshin në rafte “në kavanoza, të freskët dhe të ngrirë”. Fotot e pasvjedhjes treguan frigoriferë pothuajse bosh.
Megjithatë, një pjesë e kërmijve të vjedhur nuk ishte ende gati për konsum: guaskat nuk ishin pastruar dhe gjalpi i përgatitjes tradicionale nuk ishte prodhuar. “Nuk mund ta konsumosh drejtpërdrejt,” tha pronari Jean-Mathieu Dauvergne për France Info.
Ferma mbarështon rreth 350,000 kërmij çdo vit, duke furnizuar edhe restorante të përzgjedhura, përfshirë lokale me yje Michelin. Vjedhja ndodhi pikërisisht para periudhës më të rëndësishme të vitit: 60% e të ardhurave realizohen gjatë Krishtlindjeve dhe natës së Vitit të Ri.
Fermerët fqinjë janë solidarizuar duke ofruar ndihmë për të shpëtuar sezonin.
“Jemi gati ta mbështesim sa më shpejt që të mundemi,” tha Alexandre Maire, fermer kërmijsh nga Vosges, për France Info.
Ndërkohë, policia po heton vjedhjen, por deri tani nuk ka të dyshuar.
(Burimi: CNN / France Info)
