Katër burra në Sydney janë arrestuar nën dyshimin se janë pjesë e një rrjeti ndërkombëtar që shpërndante materiale abuzimi seksual me fëmijë, një pjesë e të cilave dyshohet se përfshijnë motive ritualistike, simbole satanike dhe elemente okulte. Policia e Uellsit të Ri Jugor konfirmoi se hetimet vazhdojnë, ndërsa autoritetet po përpiqen të identifikojnë viktimat dhe origjinën e materialeve.
Detektivja Jayne Doherty, komandante e skuadrës së krimeve seksuale, deklaroi se materialet e shpёrndara nga të dyshuarit përfshijnë pamje “të neveritshme” të abuzimit të fëmijëve që variojnë nga mosha foshnjore deri në 12 vjeç, si dhe abuzime ndaj kafshëve. Sipas saj, policia do t’i paraqesë gjykatës të dhëna që tregojnë se ky grup ndërkombëtar ishte përfshirë në komunikime dhe shkëmbim videosh që përshkruanin torturë të fëmijëve dhe akte të lidhura me simbolikë satanike. Gjatë kontrolleve u sekuestruan mijëra video të klasifikuara si prova kyçe në hetim.
Një video e publikuar nga policia tregon arrestimin e një 26-vjeçari në Waterloo, i cili dyshohet se kishte një rol qendror në rrjet. Ai akuzohet për shpërndarje dhe posedim të materialeve të abuzimit me fëmijë, si edhe për posedim të përmbajtjes me abuzim ndaj kafshëve. Tre të dyshuar të tjerë, të moshave 46, 42 dhe 39 vjeç, u arrestuan në Malabar dhe përballen me akuza të ngjashme lidhur me posedimin dhe shpërndarjen e materialeve të ndaluara. Të katër të arrestuarve u është refuzuar liria me kusht dhe pritet të paraqiten në gjykatë në janar të vitit të ardhshëm.
Hetimi është pjesë e Strike Force Constantine, një task-forcё e ngritur në prill për të hetuar shpërndarjen online të materialeve të abuzimit seksual të fëmijëve që përfshijnë motive ritualiste ose satanike. Policia kishte marrë informacion në nëntor për një grup burrash në Sydney që dyshohej se ishin pjesë e një grupi më të gjerë pedofile. Sipas detektives Doherty, burrat jo vetëm komunikonin rregullisht mes tyre, por ndanin materiale eksplicite në platforma të koduara me anëtarë nga vende të tjera.
Mediat ndërkombëtare raportojnë se deri tani policia nuk ka identifikuar ende asnjë viktimë specifike dhe se nuk është e qartë nëse videot janë prodhuar në Australi apo jashtë vendit. Autoritetet po bashkëpunojnë me agjenci të huaja për të ndjekur gjurmët digjitale të materialeve dhe për të zbuluar nëse të dyshuarit ishin të përfshirë në prodhimin apo vetëm në shpërndarjen e tyre. Kontrollet e bёra në Waterloo, Ultimo dhe Malabar çuan në sekuestrimin e pajisjeve elektronike, serverëve të vegjël dhe telefonave, të cilat përmbajnë mijëra dosje që tani po analizohen nga hetuesit.
Policia ka bërë apel për informacion nga publiku, duke e cilësuar rastin si një nga hetimet më të ndërlikuara dhe më tronditëse të viteve të fundit.
(Burimi: CNN)
