Parlamenti kilian i ka dhënë miratimin përfundimtar ligjit që do të ndalojë përdorimin e telefonave celularë në të gjitha shkollat në vend duke filluar nga viti 2026. Dhoma e Deputetëve miratoi amendamentet e paraqitura nga Senati, duke i hapur rrugёn Presidentit Gabriel Boric të vazhdojë me shpalljen e ligjit.
Ministri i Arsimit, Nicolás Cataldo, shpjegoi se: “Ne kemi miratuar ligjin që ndalon përdorimin e telefonave celularë”, duke specifikuar se ndalimi do të ndikojë në të gjithë sistemin shkollor, me përjashtime të lejuara vetëm në rrethana specifike që lidhen me shëndetin e nxënësve ose urgjenca të mundshme.
Sipas autoriteteve, ky veprim synon të forcojë përqendrimin e nxënësve dhe të përmirësojë bashkëjetesën në klasë duke kufizuar shpërqendrimet gjatë aktiviteteve mësimore. Një projekt eksperimental i kryer në një shkollë në Santiago kishte treguar tashmë shenja inkurajuese në aspektin e pjesëmarrjes dhe mirëqenies së nxënësve.
Të dhënat e PISA 2023 tregojnë se mbi gjysma e studentëve kilianë raportojnë se shpërqendrohen nga pajisjet dixhitale gjatë orës së mësimit. Për pёrfaqёsuesit e qeverisё nё Kili, rregullorja e re përfaqëson “një ndryshim të domosdoshëm kulturor” për të mbështetur socializimin dhe të nxënit në një mjedis të shenjuar gjithnjё e mё shumё nga fluksi i aktiviteti online.
(Pёrshtatur nga TGCOM)
