Alex Pereira rifitoi titullin kampion në kategorinë “Lightweight” me një nokaut teknik ndaj ruso-dagestanezit Magomed Ankalaev në UFC 320, në Las Vegas.
Pereira ka ekzaltuar publikun e T-Mobile Arena të Las Vegasit, mbrëmjen e së shtunës, kur asgjësoi që në raundin e parë kundërshtarin e tij Ankalaev me nokaut teknik. Ndeshja ishte një revansh i zhvilluar për titull, në kategorinë e peshës “Lightweight” në sportin e Arteve të Miksuara Marciale në Ultimate Fighting Championship (UFC) 320.
Magomed Ankalaev, një sportist shumë i kualifikuar, pësoi një hakmarrje të “ëmbël” nga Alex Pereira, të cilin e kishte mundur shtatë muaj më parë.
Pereirës i është dashur vetëm një minutë e 20 sekonda për të mposhtur Ankalaev, pasi e rrëzoi kampionin 33-vjeçar rus me një goditje fatale grushti, në pjesën anësore të kokës. Pasi Ankalaev u rrëzua, pjesa e mbetur ishte një histori disfate, që u ndërpre nga arbitri i ndeshjes në momentin e duhur, pasi brrylat dhe goditjet e forta të Pereirës ndaj Ankalaevit të rrëzuar mund të shkaktonin pasoja fatale po të liheshin më shumë.
Ankalaev, i cili nuk ishte mundur kurrë në një ndeshje të UFC, i dha fund serisë së tij prej 14 ndeshjesh pa humbje, që datonin me debutimin e tij në UFC Fight Night, në mars 2018.
Ankalaev (20-2-1, 12-2-1 UFC) e kishte mposhtur Pereiran (13-3, 10-2 UFC) në ndeshjen e tyre të parë në UFC 313 më 8 mars 2025, ndeshje për të cilën Pereira pretendoi se e luftoi vetëm me 40 përqind të aftësive të tij për shkak të një lëndimi.
Fitorja e Pereirës e rikthen atë për të dytën herë kampion të peshës “Lightweight” të UFC, por hap njëkohësisht edhe një sfidë për titullin me çekun kontravers Jiri Prochazka (32-5-1), i cili gjithashtu fitoi në të njëjtën mbrëmje ndaj Khalil Rountree Jr (15-7-0).
UFC përgatitet për një fund të vitit 2025 me plot ndeshje dhe surpriza për tifozët e shumtë të MMA. Dyluftime epike do zhvillohen ndërmjet Oliveira kundër Gamrot; Aspinall kundër Gane dhe Della Maddalena kundër Makhachev.
