Lando Norris është shpallur kampioni i ri i botës në Formula 1, duke mbyllur një nga sezonet më dramatikë të dekadës me vetëm dy pikë epërsi ndaj Max Verstappen.
Sezoni i 2025-ёs ka qenë një rrugëtim i vështirë për britanikun. Ai nisi si favorit, u gjend nën presion nga shoku i skuadrës Oscar Piastri, më pas u godit nga rikthimi i furishëm i Verstappen në pjesën e dytë të kampionatit. Madje pati momente kur duket se gjithçka po i rrëshqiste nga duart, si në Holandë, ku pas tërheqjes së dhimbshme ai u shpreh i dëshpëruar se donte vetëm një hamburger dhe të shkonte në shtëpi. Por pikërisht aty nisi kthesa e tij e madhe. Me vendosmëri të hekurt, me qetësi të admirueshme psikologjike dhe me teknikë të rafinuar, Norris rifitoi terren hap pas hapi, duke treguar se një kampion lind në momentet e vështira.
Gjatë gjithë sezonit ai u përball me sfida të shumta: përplasjen me Piastrin në Kanada, gabimet strategjike të McLaren-it në disa gara kyçe, presionin që i vinte nga dy fronte njëkohësisht. E megjithatë, ai nuk u thye. Fitoret në Australi, Monaco, Silverstone, Hungari dhe Meksikë e mbajtën gjallë në luftë deri në fund, ndërsa qetësia e tij në Abu Dabi vendosi gjithçka. Ai e menaxhoi garën si një pilot me përvojë shumë më të madhe sesa mosha e tij, duke shmangur rreziqet dhe duke mbajtur fort pozicionin që i garantonte titullin.
Në fund të garës, kur tre makinat — Verstappen, Piastri dhe Norris — kaluan finish-in në atë renditje, historia u shkrua. Me 423 pikë ndaj 421 të Verstappen, Lando Norris u shpall kampioni i ri i Formula 1, britaniku i parë që mbretëron pas titullit të fundit të Lewis Hamilton në vitin 2020. McLaren, pas shumë vitesh pritjeje dhe rikonstruksioni, u rikthye në majë të botës.
Ky sezon ishte një test i aftësisë, durimit dhe shpirtit garues të Norris. Dhe ai e mbylli ashtu siç e nisi: duke besuar se mund ta bënte. Tani, Formula 1 ka një “mbret” të ri — dhe gara sapo ka filluar.
