Historia e familjes që jetonte në pyll vazhdon të prekë opinionin publik në Itali. Çifti anglo-australian, Catherine dhe Nathan Trevallion Birmingham, janë ende në pritje të vendimit të Gjykatës së të Miturve në L’Aquila, e cila do të përcaktojë nëse tre fëmijët e tyre do t’u kthehen apo jo.
Në mes të debatit të madh publik, një zë i njohur është bërë pjesë e kauzës së tyre: këngëtari legjendar Al Bano. Gjatë emisionit “Diario del Giorno”, ai tregoi publikisht se i ka ofruar familjes një shtëpi dhe një vend pune, si një akt solidariteti i pastër.
“Po pres një përgjigje nga ata zotërinj, dua të di më shumë,” tha artisti në një mesazh audio të transmetuar në program. “Gjithçka dua të bëj është t’u jap atyre mundësinë të jetojnë jetën që meritojnë. Kam thënë se pres përgjigje nesër ose pasnesër.”
Al Bano theksoi se gjesti i tij nuk ka asnjë qëllim vetëlavdërues: “Kjo nuk është mënyrë për t’u bërë publik. Kjo nuk më jep kënaqësi,” – u shpreh ai me ton të prerë.
Këngëtari 81-vjeçar tregoi edhe arsyen personale që e shtyu të reagojë kaq fort: një pjesë e fëmijërisë së tij i ngjan asaj të familjes Birmingham.
“Kam jetuar si ata. Kam pasur një banjo jashtë shtëpisë. Kam jetuar afër pyllit edhe kur u rrita. Si fëmijë, e dija shumë mirë se çfarë do të thoshte të rriteshe brenda natyrës. Është një jetë e vështirë, por është jetë e vërtetë.”
Ndërsa gjykata përgatitet të marrë vendimin përfundimtar, oferta bujare e Al Banos ka sjellë një dritë shprese në një histori të ndërlikuar që ka tronditur Italinë.
(Burimi: TGCOM)
