Një botim tepër i rrallë i Biblës së Mbretit James, i shtypur në vitin 1611, ka kapur një çmim marramendës në ankand, duke u shitur për 23,000 paund – më shumë se pesëfish i vlerës së parashikuar.
Libri, një nga botimet e para të kësaj Bible historike, u ble nga tregtari i librave të rrallë Simon Finch nga Norfolku. Ky botim i parë është veçanërisht i kërkuar për shkak të një gabimi të famshëm shtypi në Librin e Ruthit, ku teksti shkruan “dhe ai hyri në qytet” në vend të “dhe ajo hyri në qytet”. Kjo e bën kopjen një “thesar” të vërtetë për koleksionistët.
I pyetur për çmimin marramendës prej 23,000 paundësh për një libër që dikur kushtonte vetëm 10 shilinga, z. Finch tha me entuziazëm: “Është një gjë e mrekullueshme. Isha vërtet i lumtur t’i paguaja këto para.”
Ai tregoi se vendimi për të udhëtuar drejt Yorkshire për ta parë nga afër para ankandit ishte vendimtar: “Pa atë vizitë, ndoshta nuk do të kisha marrë pjesë fare. Ajo që pashë më bindi – një kopje shumë e mirë, aspak e manipuluar.”
Edhe pse Biblёs i mungon faqja e titullit, Finch theksoi se kjo nuk është diçka e pazakontë: shumë pak kopje të kësaj moshe kanë mbijetuar pa humbje të ngjashme.
Specialistja e shtëpisë së ankandit Duggleby Stephenson, Coralie Thomson, sqaroi se ky përkthim monumental i Biblës në anglisht u porosit nga Mbreti James në vitin 1604 dhe u përgatit për shtatë vite nga gati 50 prej studiuesve më të shquar të kohës.
Bibla u botua më 1611, por kopjet e para që dolën nga shtypshkrimi përmbanin disa gabime. Pikërisht gabimi në Librin e Ruthit është ai që shënon botimet e para, të njohura sot si versionet “Ai”, më të rralla se variantet pasuese “Ajo”, ku gabimi u korrigjua menjëherë.
Fillimisht, artefakti u vlerësua me një çmim të kujdesshëm prej 2,000–4,000 paundësh, por interesimi i madh paraprak ngriti ofertat menjëherë në 10,500 paund, duke i finalizuar me çmimin prej 23,000 paundësh.
(Burimi: BBC)
