Ish-ministri i Mjedisit, Lefter Koka, ka lënë sot ambientet e paraburgimit, pas një serie zhvillimesh gjyqësore që kanë ndryshuar ndjeshëm pozitën e tij juridike.
Burime pranë procesit gjyqësor bëjnë të ditur se Koka ka përfunduar dënimin për çështjen e inceneratorit të Tiranës, ndërsa masa e dhënë për inceneratorin e Fierit është shuar, pasi dosja është rikthyer për rishqyrtim në Apel nga Gjykata e Lartë.
Ndërkohë, për çështjen e inceneratorit të Elbasanit, ish-ministrit i është caktuar masa e “lirimit me kusht” më herët nga Gjykata e Durrësit. Këto zhvillime, të ndërthurura me afatet tashmë të tejkaluara të paraburgimit, kanë çuar në daljen e tij nga qelia, ku ai qëndronte që prej dhjetorit 2021.
Koka, i cili në shtator u dënua me 6 vite e 8 muaj burgim—pas përfitimit nga gjykimi i shkurtuar—ka deklaruar vazhdimisht se është i pafajshëm dhe se hetimet ndaj tij kanë qenë të padrejta.
Megjithatë, zvarritjet proceduriale dhe konfliktet midis vendimeve të niveleve të ndryshme të gjykatave kanë krijuar një tablo të ndërlikuar juridike, e cila sot rezultoi në lirimin e tij.
Lirimi i ish-ministrit vjen në një ditë me intensitet të lartë politik e institucional: Kuvendi zhvillon seancë plenare ku pritet debati për Avokatin e Popullit, ndërsa paralelisht pritet zgjedhja e drejtuesit të ri të SPAK-ut—institucion që mbart peshën kryesore të hetimeve për korrupsion dhe krim të organizuar.
Fenomeni i lirimeve për shkak të tejkalimit të afateve të paraburgimit, prej vitesh i kontestuar nga juristë dhe opinioni publik, duket se po konsolidohet si rrugëdalje për shumë të pandehur, sidomos në çështje të ndërlidhura me korrupsionin në nivele të larta.
Ironikisht, rastet e tilla shpërthejnë në vëmendje pikërisht në ditë kur fokusi publik është diku tjetër.
Mbase ka ardhur momenti që drejtësia të kthejë sytë seriozisht edhe tek dimensioni procedural – zvarritjet e afateve- që në fund të ditës, bëhen vendimtare për fatin e dosjeve të mëdha.
