Papa Leo XIV ka bërë thirrje për më shumë përgjegjësi etike dhe institucionale në përdorimin e inteligjencës artificiale, duke theksuar rreziqet që teknologjitë dixhitale paraqesin për fëmijët dhe adoleshentët. Mesazhi u përcoll gjatë një audience në Vatikan me pjesëmarrësit e konferencës ndërkombëtare “Dinjiteti i Fëmijëve dhe Adoleshentëve në Epokën e Inteligjencës Artificiale”.
Gjatë takimit, Ati i Shenjtë u ndal edhe te një rast i dhimbshëm, duke u takuar me Megan Garcia, nënën e një djali 14-vjeçar amerikan që humbi jetën në vitin 2024, pas një përdorimi kompulsiv të një chatbot-i. Ky takim, sipas Vatikanit, e përforcoi paralajmërimin e Papës për ndikimin që inteligjenca artificiale dhe platformat dixhitale mund të kenë mbi shëndetin mendor, sigurinë dhe dinjitetin e të miturve.
“Inteligjenca artificiale po transformon shumë aspekte të jetës sonë të përditshme, përfshirë arsimin, argëtimin dhe sigurinë e fëmijëve”, u shpreh Papa, duke theksuar nevojën për një qasje etike dhe të përgjegjshme në zhvillimin dhe përdorimin e këtyre teknologjive.
Megan Garcia ndau historinë e djalit të saj, Sewell Setzer III, duke përshkruar izolimin gradual dhe varësinë e tij nga ndërveprimet dixhitale. Ajo u bëri thirrje prindërve, institucioneve dhe kompanive teknologjike të jenë më vigjilente ndaj shenjave paralajmëruese dhe të marrin më shumë përgjegjësi për produktet që u drejtohen të rinjve.
Papa Leo XIV vuri në dukje se fëmijët dhe adoleshentët janë veçanërisht të cenueshëm ndaj ndikimit të algoritmeve, të cilat mund të formësojnë preferencat dhe vendimet e tyre pa vetëdije. Ai theksoi se është thelbësore që prindërit dhe edukatorët të kuptojnë këto mekanizma dhe të kenë në dispozicion mjete që u mundësojnë të monitorojnë dhe udhëheqin marrëdhënien e të miturve me teknologjinë.
Në fjalën e tij, Ati i Shenjtë iu drejtua edhe qeverive dhe organizatave ndërkombëtare, duke theksuar se ato kanë përgjegjësi të drejtpërdrejtë për të përditësuar ligjet e mbrojtjes së të dhënave, për të forcuar mbikëqyrjen e platformave dhe për të vendosur standarde etike të përbashkëta për përdorimin e inteligjencës artificiale. Sipas tij, mbrojtja e dinjitetit të të miturve nuk mund të lihet vetëm në dorë të tregut apo vetë familjeve.
Papa theksoi gjithashtu rolin kyç të familjeve, shkollave dhe rrjeteve arsimore, duke nënvizuar se edukimi dixhital duhet të jetë i vazhdueshëm dhe i mbështetur nga të rritur të trajnuar. Ai paralajmëroi për rreziqet që sjell një qasje e hershme, e pakufizuar dhe e pamonitoruar ndaj teknologjisë, e cila mund të ndikojë negativisht në marrëdhëniet dhe zhvillimin e të rinjve.
Sipas Papa Leo XIV, ndërgjegjësimi duhet të jetë një proces i përbashkët, ku edhe vetë të miturit përfshihen aktivisht në kuptimin e rreziqeve dhe pasojave të përdorimit të rrjeteve digjitale. Vetëm në këtë mënyrë, tha ai, mund të forcohet aftësia e tyre për të bërë zgjedhje të përgjegjshme, si për veten ashtu edhe për të tjerët.
Në përfundim, Papa theksoi se ruajtja e marrëdhënieve njerëzore dhe e veçantisë personale mbetet thelbësore edhe në epokën e teknologjive inteligjente. “Dinjiteti njerëzor duhet të mbetet një vlerë parësore”, tha ai, duke bërë thirrje për një qasje kolektive, edukative dhe etike, që inteligjenca artificiale të shërbejë si aleate në rritjen dhe zhvillimin e të miturve, dhe jo si një kërcënim për ta.
(Burimi: TGCOM)
