Aktorët e serialit legjendar “Friends” janë ribashkuar këtë javë për të nderuar kujtimin e bashkë-yllit të tyre të ndjerë, Matthew Perry, i cili u nda nga jeta tragjikisht dy vjet më parë, në moshën 54-vjeçare.
Jennifer Aniston, Courteney Cox, Matt LeBlanc, Lisa Kudrow dhe David Schwimmer janë bërë pjesë e një nisme bamirësie, duke kontribuar në një koleksion të veçantë veprash arti, të krijuara për të mbledhur fonde gjatë sezonit festiv. Iniciativa synon të mbështesë organizata bamirëse, përfshirë edhe Fondacionin Matthew Perry, i cili ndihmon persona që përballen me varësinë.
Fondacioni ndau në Instagram imazhe të aktorëve teksa firmosin printime shumëngjyrëshe, të frymëzuara nga kënga ikonike hyrëse e serialit “Friends”. Veprat artistike janë realizuar nga artisti Tim Wakefield, i cili ka transformuar valët zanore të muzikës së serialit në dizajne unike, secila e lidhur me një personazh të ndryshëm. Printimet e firmosura shiten për 600 dollarë, ndërsa versionet pa autograf për 100 dollarë.
“Njoftim emocionues! Kasti i ‘Friends’ është bashkuar me Soundwaves Art dhe artistin Tim Wakefield për një koleksion shumë të veçantë këtë sezon festash”, shkruan fondacioni në postimin e tij. Në bashkëpunim me trashëgiminë e Matthew Perry-t, është prodhuar edhe një edicion shumë i kufizuar veprash arti me firmën zyrtare të aktorit. Të gjitha të ardhurat do të shkojnë për bamirësi.
Matthew Perry, i njohur për rolin e dashur të Chandler Bing, u nda nga jeta në tetor 2023. Pas vdekjes së tij, u krijua Fondacioni Matthew Perry për të nderuar aktorin, fondacion qё u vjen në ndihmë personave që luftojnë me varësinë ndaj lёndёve psikotrope.
Në faqen zyrtare të fondacionit citohet një nga deklaratat më prekëse të aktorit:
“Kur të vdes, nuk dua që ‘Friends’ të jetë gjëja e parë që përmendet. Dua që ndihma ndaj të tjerëve të jetë gjëja e parë që përmendet. Dhe do ta jetoj pjesën tjetër të jetës sime duke e vërtetuar këtë.”
Vdekja e Perry-t tronditi botën e kinemasë dhe publikun në mbarë botën. Ish-bashkëpunëtorët e tij reaguan asokohe me një deklaratë të përbashkët, ku theksuan se ata ishin “më shumë sesa thjesht shokë kasti”, por “një familje”.
(Burimi: BBC)
