Matt Damon dhe Luciana Barroso festojnë 20-vjetorin e martesës së tyre, një histori dashurie që nisi rastësisht dhe u shndërrua në një nga lidhjet më të qëndrueshme dhe diskrete të Hollivudit.
Çifti u njoh në vitin 2003 gjatë xhirimeve të filmit Stuck on You në Miami Beach, ku Luciana punonte si kamariere, ndërsa Damon ishte pjesë e kastit. Ajo që aktori nuk e kishte parashikuar ishte se ky takim do t’i ndryshonte jetën. Dy vjet më vonë, më 9 dhjetor 2005, ata u martuan në një ceremoni civile shumë private në Manhattan, larg vëmendjes së mediave.
Në fillim, Luciana Barroso, atëherë nënë e një vajze të vogël nga një lidhje e mëparshme, kishte hezituar të niste një lidhje me aktorin. Ajo ka treguar se prioriteti i saj ishte vajza dhe familja, diçka që, sipas saj, ishte pikërisht ajo që e tërhoqi më shumë Matt Damon. Aktori ka pranuar se fakti që Luciana ishte nënë dhe e vendoste familjen në plan të parë ishte një nga arsyet pse u dashurua me të.
Sot, Matt Damon dhe Luciana Barroso janë prindër të katër vajzave: Alexia (1998), vajza e Lucianës nga një lidhje e mëparshme, si dhe Isabella (2006), Gia (2008) dhe Stella (2010). Aktori ka folur shpesh për marrëdhënien e ngushtë që ka me Alexian, duke e konsideruar atë njësoj si vajzat e tij biologjike.
Pavarësisht famës botërore të Matt Damon, çifti ka zgjedhur gjithmonë të mbajë një profil të ulët dhe një jetë familjare larg skandaleve. Ata shfaqen rrallë në publik, kryesisht në evente të rëndësishme filmike, të shoqëruar nga fëmijët e tyre.
Matt Damon, i lindur në Kembrixh të Masaçusetsit, ka ndërtuar një karrierë të suksesshme në industrinë e filmit, por shpesh ka theksuar se familja mbetet prioriteti i tij kryesor. Martesa me Luciana Barroson konsiderohet nga shumë si një nga historitë më të qëndrueshme të dashurisë në Hollivud, larg zhurmës dhe ekspozimit të tepruar mediatik.
(Burimi: ¡Hola!)
