Nga tani, kalimi nëpër Tunelin e Llogorasë do të jetë me pagesë. Sipas Udhëzimit të Përbashkët nr. 4, datë 12 shtator 2025, të firmosur nga zëvendëskryeministrja dhe ministrja e Infrastrukturës dhe Energjisë Belinda Balluku dhe ministri i Financave Petrit Malaj, përdorimi i tunelit do të tarifojë automjetet sipas llojit dhe përmasave të tyre. Vendimi është botuar në Fletoren Zyrtare të datës 2 tetor 2025, duke hyrë zyrtarisht në fuqi.
Sipas dokumentit, veturat dhe automjetet e lehta do të paguajnë 250 lekë për kalim. Motoçikletat dhe mjetet me tre ose katër rrota do të paguajnë 100 lekë, ndërsa automjetet me rimorkio ose karavan 500 lekë. Për autobusët dhe kamionët e mëdhenj tarifa shkon në 1,000 lekë, dhe për mjetet me katër ose më shumë boshte, përfshirë kamionët me shumë rimorkio, pagesa do të jetë 5,000 lekë.
Në udhëzim parashikohet se mjetet që transportojnë mallra të rrezikshme nuk do të lejohen të kalojnë nëpër tunel. Nga pagesa përjashtohen automjetet e Policisë, zjarrfikëses, ambulancave, forcave ushtarake dhe të NATO-s, si dhe personat me status invalidi që përdorin automjete për nevoja personale. Gjithashtu, mjetet e Autoritetit Rrugor Shqiptar dhe të Entit Kombëtar të Operimit Rrugor, kur janë në shërbim, do të jenë të përjashtuara nga tarifa.
Tarifat me parapagim pritet të zbatohen gjashtë muaj pas hyrjes në fuqi të udhëzimit, ndërsa për zbatimin e plotë të vendimit janë ngarkuar Ministria e Infrastrukturës dhe Energjisë, Ministria e Financave, Autoriteti Rrugor Shqiptar dhe Enti Kombëtar i Operimit Rrugor.
Tuneli i Llogorasë, që lidh segmentin Orikum–Dukat, është pjesë e një rrjeti strategjik rrugor kombëtar, dhe me zbatimin e këtij udhëzimi, hyn në fazën e parë të operimit me sistem tarifimi për përdoruesit e rrugës.
