Një burrë dhe një grua kanë humbur jetën në Japoni pasi mbetën të bllokuar në një dhomë private saune që u përfshi nga flakët, të hënën në Tokio.
Sipas mediave lokale, Policia Metropolitane e Tokios po heton mundësinë që një dorezë dere me defekt t’i ketë penguar viktimat të dilnin nga dhoma e saunës në ambientin Sauna Tiger, në lagjen Akasaka. Hetimet kanë zbuluar gjithashtu se sistemi i alarmit të emergjencës brenda saunёs ishte i fikur.
Viktimat janë identifikuar si Yoko Matsuda, 37 vjeçe, artiste thonjsh, dhe bashkëshorti i saj Masanari Matsuda, 36 vjeç, i cili drejtonte një sallon bukurie.
Departamenti i zjarrfikësve u njoftua rreth orës 12:25 sipas orës lokale, pasi u aktivizua alarmi i zjarrit në objekt. Kur zjarrfikësit mbërritën në vendngjarje, doreza e derës së saunës u gjet në dysheme, thanë hetuesit për mediat japoneze.
Çifti u gjet i rrëzuar në dysheme, njëri mbi tjetrin, me kokat pranë derës së dhomës. Ata u transportuan me urgjencë në spital, por më vonë u konfirmua se kishin ndërruar jetë.
Policia njoftoi se brenda saunës u gjet një peshqir i djegur, duke ngritur dyshime se zjarri mund të jetë shkaktuar nga kontakti i tij me gurët e nxehtë të saunës.
Dhoma ishte e pajisur me një buton alarmi emergjence në mur, i cili duhej të njoftonte stafin në rast rreziku. Megjithatë, hetuesit zbuluan se alarmi ishte i fikur, ndërsa mbulesa e tij ishte hequr, çka sugjeron se çifti mund të ketë tentuar të kërkonte ndihmë. Sipas policisë, stafi ka deklaruar se alarmi nuk kishte funksionuar “që nga viti 2023”.
Qendra e Shëndetit Publik e Minatos deklaroi pёr mediat se sauna ishte hapur nё korrik tё vitit 2022 dhe ishte inspektuar për herë të fundit në prill të vitit 2023, pa u konstatuar “mangësi të mëdha në pajisje”.
Saunat janë bërë gjithnjë e më popullore në Japoni, veçanërisht ato me dhoma private. Megjithatë, vitet e fundit është shënuar një rritje e aksidenteve, duke shtuar thirrjet për rregullim më të rreptë të industrisë.
Në një deklaratë zyrtare, Sauna Tiger shprehu “ngushëllimet më të thella” për familjarët e viktimave dhe tha se po e merrte incidentin “shumë seriozisht”, duke bashkëpunuar plotësisht me hetimet e autoriteteve. Ambienti do të qëndrojë i mbyllur përkohësisht, ndërsa klientëve me rezervime u është ofruar rimbursim.
(Burimi: BBC)
