Sipërmarrësi italian Flavio Briatore ka komentuar ashpër rolin e Evropës në skenën globale, duke mbështetur deklaratat e Presidentit amerikan Donald Trump, gjatë një interviste në emisionin “Dritto e Rovescio”. Duke u bazuar edhe në marrëdhënien personale që ka me Trump, Briatore tha se kritikat e tij ndaj Bashkimit Evropian nuk janë të pabaza.
“Trump ka të drejtë kur thotë se Evropa nuk ka rëndësi për asgjë,” u shpreh Briatore, duke argumentuar se qendrat reale të pushtetit global sot janë Shtetet e Bashkuara, Azia dhe Kina. Sipas tij, Evropa nuk arrin të ketë një rol të unifikuar dhe ndikues në politikën ndërkombëtare.
Sipërmarrësi e përshkroi kontinentin evropian si “një grumbull shtetesh”, duke theksuar mungesën e një vizioni të përbashkët. “Nuk kemi ushtri të përbashkët, politikat janë krejtësisht të ndryshme dhe është shumë e vështirë të bashkosh vende me interesa, strategji dhe kultura kaq të ndryshme,” tha Briatore. Ai shtoi se disa vende evropiane, sipas tij, “thjesht pranojnë vendimet e të tjerëve, pa pasur ndikim real”.
Briatore foli edhe për anën personale të Donald Trump, duke e përshkruar si një njeri praktik dhe vendimmarrës. “Trump nuk është politikan klasik, ai është biznesmen. Ai e drejton vendin si një kompani dhe di si t’i çojë gjërat deri në fund,” u shpreh ai, duke shtuar se presidenti amerikan është i drejtpërdrejtë dhe thotë hapur atë që mendon.
Deklaratat e Briatores vijnë në të njëjtën linjë me fjalët e fundit të Trump, të cilat u rikujtuan edhe gjatë emisionit. Presidenti amerikan e ka përshkruar Evropën si “të dobët” dhe “duke u shkatërruar vetë”, duke e akuzuar për korrektesë të tepruar politike. “Ata duan të jenë politikisht korrektë dhe kjo i bën të dobët. Nuk dinë çfarë të bëjnë, as në tregti. Po shoh marrëveshje tregtare që janë të rrezikshme, por Evropa heziton,” kishte deklaruar Trump.
Komentet e Briatores dhe Trump-it rikthejnë në qendër të debatit krizën e identitetit dhe të lidershipit evropian, në një kohë kur tensionet gjeopolitike dhe ekonomike po rriten dhe kërkojnë vendime të shpejta dhe të bashkërenduara.
(Burimi: TGCOM)
