Brit Awards 2026 do të shënojnë një moment historik për muzikën britanike, pasi ceremonia do të zhvillohet për herë të parë jashtë Londrës. Çmimet prestigjioze do të mbahen në Mançester, në arenën Co-op Live, të shtunën më 28 shkurt 2026, duke i dhënë fund një tradite që zgjaste që nga viti 1977.
Zhvendosja simbolizon një hap të rëndësishëm drejt decentralizimit kulturor dhe nderon Mançesterin si një nga qytetet më ikonike të muzikës në Mbretërinë e Bashkuar.
Kush do ta prezantojë ceremoninë?
Komediani Jack Whitehall do të rikthehet si prezantues për të gjashtin vit radhazi. Për Whitehall-in, ky rikthim ka edhe një domethënie personale, pasi Mançesteri është qyteti ku ai hodhi hapat e parë në komedi.
“Është një moment vёrtet kuptimplotё pёr mua,” u shpreh ai. “Arena është vetëm pak hapa larg klubit të komedisë ku bëra setin tim të parë 10-minutësh vite më parë. Shpresoj të qeshim pak më shumë se atë natë – mezi po pres.”
Çmimet dhe kategoritë
Në Brit Awards 2026 do të ndahen 16 çmime, mes tyre: Artisti i Vitit, Albumi i Vitit, Artisti më i Mirë.
Çdo fitues do të marrë një trofe unik, të dizenjuar posaçërisht për këtë edicion dhe të frymëzuar nga emblema e bletës së Mançesterit, simbol i historisë industriale dhe shpirtit punëtor të qytetit.
Çmimi “Artisti Shpërthyes” nderon talentet që kanë arritur të depërtojnë te një audiencë më e gjerë. Fituesit e viteve të fundit përfshijnë emra të njohur si RAYE, Wet Leg, Little Simz dhe The Last Dinner Party.
Kandidaturat e para të shpallura
Deri tani, vetëm një kategori ka shpallur listën e ngushtë të kandidatëve: Brits Critics’ Choice. Tre artistët e përzgjedhur për vitin 2026 janë: Jacob Alon, Rose Gray, Sienna Spiro.
Ky çmim është konsideruar tradicionalisht si një parashikues i sukseseve të mëdha, pasi fitues të mëparshëm kanë qenë Adele, Sam Smith, Sam Fender, Celeste, Jorja Smith dhe së fundmi Myles Smith.
Brit Awards 2026 pritet të jetë jo vetëm një festë e muzikës, por edhe një homazh për trashëgiminë kulturore të Mançesterit, duke sjellë një edicion ndryshe nga çdo tjetër më parë.
(Burimi: BBC)
