Ylli i tenisit Venus Williams ka kurorëzuar dashurinë me aktorin italian Andrea Preti në një dasëm romantike në Palm Beach, Florida, gjatë fundjavës, mes miqsh të ngushtë dhe familjarësh.
Çifti shkëmbeu betimet në një ceremoni intime dhe elegante, ku mes të ftuarve ishte edhe motra e famshme e Venusit, Serena Williams.
Venus shkëlqeu me një fustan nusërie prej dantelle transparente, me prerje elegante dhe romantike, i dizenjuar nga stilisti Georges Hobeika, sipas fotove të publikuara nga revista Vogue. “Doja të vishja një fustan që Andrea do ta adhuronte dhe që të ishte magjik, perfekt për një dasmë në Florida,” u shpreh ajo.
Ceremonia u organizua nga Jennifer Zabinski e JZ Events, e njëjta kompani që kishte planifikuar edhe dasmën e Serena Williams me Alexis Ohanian në vitin 2017.
Kjo nuk ishte hera e parë që çifti festoi martesën. Më 18 shtator, Venus (45 vjeç) dhe Preti (37 vjeç) zhvilluan një ceremoni të parë luksoze në Ischia, Itali, por për shkak të procedurave ligjore dhe dokumentacionit, ata vendosën të organizonin edhe një dasmë të dytë në SHBA.
“Gjithmonë kishim ëndërruar të martoheshim në Itali,” tregoi Venus. “Por dokumentet do të kërkonin shumë kohë, ndaj vendosëm të bënim dy ceremoni.”
Pas ceremonisë në Florida, të ftuarit u pritën në një darkë festive me kuzhinë napolitane, në një restorant ekskluziv buzë detit.
Lajmet për dasmën kishin nisur të qarkullonin pak ditë më parë, kur Venus u pa në Itali duke u përgatitur për ceremoninë, me një kapele të bardhë ku shkruhej “SIG.RA PRETI” – që shqip do të thotë “Zonja Preti”.
Venus Williams konfirmoi fejesën me Andrea Pretin në korrik, një vit pasi lidhja e tyre u bë publike. Më parë, tenistja kishte pasur lidhje me trashëgimtarin Nicky Hammond, golfistin Hank Kuehne dhe modelin Elio Pis.
(Burimi: Page Six)
