Koreja e Veriut ka publikuar të enjten pamje të reja të asaj që e cilëson si nëndetësja e saj e parë me energji bërthamore, një mjet luftarak gjigant, i krahasueshëm për nga madhësia me disa nga nëndetëset sulmuese të Marinës së Shteteve të Bashkuara.
Fotot e shpërndara nga mediat shtetërore tregojnë udhëheqësin Kim Jong Un duke inspektuar nëndetësen e pajisur me raketa të drejtuara brenda një objekti të mbyllur ndërtimi, çka tregon se ajo ende nuk është hedhur në ujë.
Ndërtimi i një nëndetëseje me energji bërthamore ka qenë një objektiv afatgjatë për Kim, i përmendur për herë të parë në kongresin e partisë në vitin 2021. Sipas analistëve, zhvillimet e fundit në Korenё e Jugut, e cila ka marrë miratim nga administrata amerikane për të ndjekur një projekt të ngjashëm, duket se i kanë dhënë më shumë urgjencë planeve të Phenianit.
Nëndetëset me energji bërthamore ofrojnë përparësi të mëdha ushtarake: ato mund të qëndrojnë nën ujë për periudha shumë të gjata, janë më të shpejta dhe, në shumë raste, më të vështira për t’u zbuluar. Aktualisht, këtë teknologji e zotërojnë vetëm disa vende, përfshirë SHBA-në, Rusinë, Kinën, Francën, Mbretërinë e Bashkuar dhe Indinë.
Sipas medias shtetërore, nëndetësja koreano-veriore ka një zhvendosje prej 8,700 tonësh, duke u afruar me përmasat e nëndetëseve bërthamore të klasës Virginia të flotës amerikane. Kim theksoi se këto mjete janë thelbësore për doktrinën mbrojtëse të vendit, e cila, sipas tij, bazohet në “fuqinë më të fortë sulmuese”.
Nga ana tjetër, ekspertë ndërkombëtarë vlerësojnë se tensionet në Gadishullin Korean po rriten kryesisht për shkak të politikave të Phenianit. Profesori Leif-Eric Easley nga Universiteti Ewha në Seul theksoi se gara e armatimeve është nxitur nga vetë Koreja e Veriut, e cila ka refuzuar diplomacinë dhe ka investuar masivisht në ushtri në dëm të zhvillimit ekonomik.
Pamjet e publikuara tregojnë gjithashtu se Kim shoqërohej nga vajza e tij, Kim Ju Ae, çka ka nxitur spekulime se ai mund të jetë duke përgatitur një pasardhëse të mundshme.
(Burimi: CNN)
