Autoritetet në Lihtenshtajn po hetojnë një rast të pazakontë dhe tronditës, pasi katër persona të së njëjtës familje u gjetën të vdekur gjatë kësaj jave, njoftoi policia të enjten.
Sipas forcave të rendit, trupi i një burri 41-vjeçar u gjet të mërkurën në anën zvicerane të lumit Rhine, pranë kryeqytetit Vaduz. Hetimet zbuluan se ai ishte një punonjës i lartë i komunës së Triesenit, në jug të Vaduzit, i cili ishte pezulluar vetëm disa ditë më parë për shkak të parregullsive të dyshuara në llogaritë financiare.
Më vonë, policia gjeti edhe trupat e tre personave të tjerë në një apartament në Vaduz. Ata ishin një burrë 73-vjeçar dhe dy gra, të moshave 68 dhe 45 vjeç, të identifikuar si prindërit dhe motra e 41-vjeçarit. Autoritetet konfirmuan se të katër viktimat i përkisnin të njëjtës familje.
Aktualisht, po kryhen autopsitё për të përcaktuar shkaqet e sakta të vdekjes së tyre, ndërsa policia nuk ka dhënë ende detaje shtesë mbi rrethanat e ngjarjes. Rasti ka ngjallur vëmendje të madhe në këtë principatë të vogël alpine, e njohur për nivelin e lartë të sigurisë dhe qetësisë.
Hetimet vazhdojnë, ndërsa autoritetet kanë bërë thirrje për durim deri në përfundimin e ekzaminimeve mjeko-ligjore dhe mbledhjen e të gjitha provave të nevojshme.
(Burimi: Reuters)
