Një tërmet me magnitudë 6.0 të shkallës Rihter goditi Perunë veriore në orët e para të mëngjesit, duke u ndjerë në disa qytete të rajonit.
Epiqendra e tërmetit u lokalizua rreth 67 kilometra në perëndim të qytetit portual Chimbote, ndërsa thellësia u regjistrua në 52 kilometra, çka ndihmoi në uljen e ndikimit shkatërrues në sipërfaqe.
Deri në këto momente, nuk raportohet për viktima apo dëme të mëdha materiale, sipas mediave lokale dhe agjencisë së lajmeve EFE. Autoritetet peruane po vijojnë monitorimin e situatës dhe u kanë bërë thirrje qytetarëve të qëndrojnë të qetë dhe të ndjekin udhëzimet e emergjencës.
Peruja ndodhet në të ashtuquajturin “Unaza e Zjarrit të Paqësorit”, një zonë me aktivitet të lartë sizmik, ku tërmetet janë relativisht të shpeshta.
(Burimi: TGCOM)
