Nga kontrasT.al
“Fitoi populli dhe Republika” – tha Albin Kurti mbrëmë, sapo konfirmoi rezultatin e fitores së Partisë së tij “Lëvizja Vetëvendosje” dhe kundërshtari i vendit të tretë (LDK) e uroi për fitoren.
Një fitore bindëse me rreth 49.50% të votave për të tretën herë, për tre mandate rresht, që i mundëson Kurtit të krijojë qeverinë dhe të marrë në dorë parlamentin e Kosovës. Por jo Presidentin!
Herën e parë, më 14 shkurt 2021, Kurti arriti 50.2% të votave.
Më 9 shkurt të këtij viti fitoi jo thellë me 42% të votave, rezultat që e la Kosovën 10 muaj pa qeveri, pasi nuk u arrit kompromisi për një qeveri të përbashkët me opozitën.
Dje, Albin Kurti dhe LVV-ja e tij, habiti Shqipërinë, Evropën dhe shumë më larg tyre se si fitohet edhe pa ndihmën e tyre.
Në Shqipëri mbetën pa fjalë. Si mund të fitojë ky njeri kur nuk vjedh as vota as taksa, as nuk bën kompromis me djallin që e ka emrin “oligark”?
Në Evropë dhe SHBA u habitën, si mund të fitojë një “kokëderr” sovranist që u tha shumë shpesh “Jo” edhe superfuqive.
Në dukje, vetëm nga përsëritja e fituesit, Kosova të krijon përshtypjen e një shteti autoritar që nuk ndërron udhëheqësin e pazëvendësueshëm, si në Tiranë, apo në Beograd. Por jo!
Albin Kurti ndryshon nga dy të tjerët. Ai nuk vjedh! Nuk mban pushtet me dhunë. Nuk bën kompromis me oligarkinë ekonomike dhe kriminale. Nuk blen median për pushtet dhe të huajt për rifitimin e tij.
Kurtin e përkrahu diaspora që vuan për sovranitetin e shumëëndërruar të tokës së Kosovës, por edhe njerëzit, populli i thjeshtë që e sheh që ai nuk ndyn duart me korrupsion. Kaq pak dhe kaq shumë e rëndësishme është kjo për njerëzit e thjeshtë, sa populli i Kosovës e votoi dy herë brenda vitit edhe pse me “kokëderrizmin” e tij mund të shkonte bashkë me të, në humnerë.
Si Altin Dumani në Tiranë, që solli për herë të parë në Shqipëri modelin e njeriut me pushtet që s’merr para nën dorë, nuk korruptohet, nuk përkulet përballë presionit të çdo ane, ashtu edhe Albin Kurti në Prishtinë me të njëjtat cilësi, me një armik më shumë (të huajt), u përqafua fort nga vota popullore.
Të dy kanë plot gabime në rrugën e tyre, por popullit i mjafton që ata nuk janë hajdutë, si gjithë shqiptarët e tjerë që kanë njohur dhe i kanë vendosur mbi kokë apo shpinë. Ata nuk korruptohen si çdo burrë apo grua që vishet me pushtet dhe, paçka gabimeve me okë që mund të kenë, për popullin kjo është mjaftueshëm që t’i mbajnë aty, në piedestal. Njërin në drejtësi dhe tjetrin në qeveri.
Kaq shumë apo kaq pak duan shqiptarët në trevat ku jetojnë. Modelin “Dumani” në Kosovë ose “Kurti” në Shqipëri.
