Gazeta amerikane Wall Street Journal ka zbardhur detaje të reja mbi mënyrën se si Jeffrey Epstein u përjashtua nga klubi luksoz Mar-a-Lago, në pronësi të Donald Trump, pas një ankese serioze të bërë nga një punonjëse e re e spa-së.
Sipas raportimit, Epstein ishte për vite me radhë një klient i rregullt i Mar-a-Lago-s. Jo vetëm kaq: klubi dërgonte punonjëse të spa-së për masazhe private në vilën e tij në Florida. Këto vizita, sipas burimeve të gazetës, vazhduan deri në vitin 2003.
Pika e kthesës erdhi kur një punonjëse 18-vjeçare, e cila sapo ishte kthyer nga vila e Epstein-it, u ankua te drejtuesit e klubit se ishte detyruar të kryente marrëdhënie seksuale. Një nga menaxherët e Mar-a-Lago-s e përshkroi incidentin në një letër dhe ia dërgoi me faks Donald Trumpit, duke e nxitur që t’i ndalonte hyrjen Epstein-it në klub.
Sipas Wall Street Journal, Trump e lexoi letrën dhe u shpreh se ishte “shkruar mirë”, duke shtuar se mund ta përjashtonte Epstein-in. Pas këtij episodi, në vitin 2003, Epstein-it iu ndalua hyrja në ambientet e spa-së së Mar-a-Lago-s dhe ai pushoi së frekuentuari klubin.
Raportimi thekson se pakënaqësitë ndaj Epstein-it kishin nisur më herët. Edhe ish-bashkëshortja e dytë e Trumpit, Marla Maples, kishte shprehur shqetësime serioze për sjelljen e tij. Ajo i kishte paralajmëruar punonjësit dhe vetë Trumpin se “diçka nuk shkonte” me Epstein-in dhe se nuk donte as vetë të kalonte kohë me të, as që bashkëshorti i saj të shoqërohej me të.
Në reagim ndaj artikullit, Shtëpia e Bardhë i ka hedhur poshtë pretendimet. Zëdhënësja Karoline Leavitt deklaroi për Wall Street Journal se bëhet fjalë për “gënjeshtra dhe aludime të sajuara për të njollosur presidentin”.
“Sado herë që kjo histori të përsëritet, faktet nuk ndryshojnë,” tha ajo. “Presidenti nuk ka bërë asgjë të gabuar dhe e përjashtoi Jeffrey Epstein-in nga Mar-a-Lago sepse ai ishte një person i përçmuar.”
Artikulli i Wall Street Journal shton një kapitull të ri në debatin e gjatë rreth marrëdhënieve të Epstein-it me figura të fuqishme dhe mënyrës se si institucionet reaguan ndaj sjelljes së tij shumë përpara se skandali të shpërthente publikisht.
(Burimi: Wall Street Journal)
