Jennifer Lopez dhe Ben Affleck u shfaqën sërish krah njëri-tjetrit në premierën e filmit të ri “Kiss of the Spider Woman”, duke rikthyer për pak çaste nostalgjinë e “Bennifer”-it, por këtë herë nën një frymë tërësisht profesionale.
Premiera e mbajtur në New York tërhoqi vëmendjen e mediave ndërkombëtare, pasi Lopez, protagoniste e filmit, dhe Affleck, producent ekzekutiv i projektit, pozuan për disa momente së bashku përpara fotografëve.
Të dy aktorët u shfaqën të buzëqeshur dhe të qetë, pa dhënë asnjë shenjë tensioni apo afërsie përtej miqësisë. Affleck, në një prononcim të shkurtër tha se ishte “krenar për punën e Jennifer-it dhe historinë që filmi sjell”, ndërsa Lopez, në intervistat e saj, u fokusua vetëm tek suksesi i projektit, duke shmangur çdo pyetje për jetën personale.
Filmi muzikor, një adaptim modern i veprës klasike me të njëjtin titull, e sjell Lopez në rolin e një ylli kinemaje që ndërthuret me historinë e një të burgosuri politik dhe shokut të tij të qelisë – një histori e ndjeshme mbi miqësinë dhe arratisjen përmes artit.
Marrëdhënia mes Lopez dhe Affleck, që dikur pushtonte kopertinat e mediave rozë, duket se tani ka marrë formën e bashkëpunimit profesional. Pavarësisht pyetjeve të shumta nga gazetarët, burime pranë produksionit konfirmuan se “mes tyre mbizotëron respekti dhe mirëkuptimi”, por jo rikthim në marrëdhënien romantike.
Pas ndarjes së tyre në vitin 2024, Lopez dhe Affleck kanë zgjedhur rrugë të ndara në jetën personale, por të dy po ruajnë një raport korrekt — dhe duket se Hollywood-i e ka mirëpritur këtë version të “Bennifer”-it: dy yje që ndajnë të njëjtën skenë, por jo më të njëjtën dashuri.
