Presidenti i Ukrainës, Volodymyr Zelensky, ka emëruar të premten shefin e inteligjencës ushtarake, Kyrylo Budanov, si drejtuesin e ri të Kabinetit të tij, pas dorëheqjes së bashkëpunëtorit të tij kryesor, Andriy Yermak, i përfshirë në një skandal korrupsioni.
Budanov, 39 vjeç, është një figurë shumë e njohur në Ukrainë, i vlerësuar për një sërë operacionesh të guximshme kundër Rusisë që prej nisjes së pushtimit në shkallë të gjerë në vitin 2022.
Emërimi i tij vjen në një moment kyç të luftës, e cila po hyn në vitin e katërt, ndërsa Zelensky ka deklaruar se një marrëveshje e ndërmjetësuar nga Shtetet e Bashkuara për t’i dhënë fund konfliktit është “90 për qind” gati.
“Ukraina ka nevojë për fokus më të madh te siguria, zhvillimi i forcave të mbrojtjes dhe te rruga diplomatike e negociatave,” tha Zelensky, duke theksuar se përvoja e specializuar e Budanovit në këto fusha është thelbësore për arritjen e rezultateve. Presidenti bëri të ditur se e kishte takuar personalisht Budanovin dhe i kishte ofruar postin e ri, gjë që u konfirmua edhe në rrjetet sociale.
Budanov njoftoi se e kishte pranuar emërimin dhe se do të vazhdonte t’i shërbente Ukrainës, duke e quajtur këtë detyrë “një nder dhe një përgjegjësi të madhe” në një moment historik për vendin. Sipas këshilltarit presidencial Dmytro Lytvyn, procedurat formale për emërimin e tij janë tashmë në proces.
Ndërkohë, Zelensky njoftoi se Budanov do të zëvendësohet në krye të inteligjencës ushtarake nga Oleg Ivashchenko, aktualisht drejtues i Shërbimit të Inteligjencës së Jashtme.
Budanov do të pasojë Andriy Yermak, i cili dha dorëheqjen në nëntor pasi hetuesit bastisën banesën e tij në kuadër të një hetimi të gjerë për korrupsion. Yermak ishte aleati më i afërt i Zelenskyt, por edhe një figurë e diskutueshme në Kiev, ku kritikët e akuzonin për përqendrim të tepruar pushteti dhe përjashtim të zërave kritikë.
Lufta në Ukrainë, më vdekjeprurësja në Evropë që nga Lufta e Dytë Botërore, ka shkaktuar dhjetëra mijëra viktima dhe ka shkatërruar zona të gjera të territorit ukrainas.
(Burimi: France 24 / AFP)
