Kompania kineze BYD ka tejkaluar Tesla të Elon Musk, duke u bërë për herë të parë shitësi më i madh në botë i automjeteve elektrike në bazë të shitjeve vjetore. Ky zhvillim shënon një moment historik në tregun global të automjeteve elektrike dhe thekson rritjen e shpejtë të prodhuesve kinezë.
Tesla njoftoi se shitjet e saj globale ranë me gati 9% gjatë vitit 2025, në rreth 1.64 milion automjete të shitura, duke shënuar vitin e dytë radhazi të rënies së dërgesave. Ndërkohë, BYD bëri të ditur se shitjet e automjeteve të saj plotësisht elektrike u rritën me afro 28%, duke kaluar shifrën e 2.25 milionë njësive të shitura gjatë vitit të kaluar.
Tesla është përballur me një vit të vështirë, mes reagimeve të përziera për modelet e reja, shqetësimeve të investitorëve për angazhimet politike të Elon Musk dhe konkurrencës gjithnjë e më të fortë nga prodhuesit kinezë. Vetëm në tremujorin e fundit të vitit 2025, shitjet e Teslës ranë me 16%, pjesërisht edhe për shkak të heqjes së një subvencioni qeveritar në SHBA që ulte çmimin e disa automjeteve elektrike deri në 7,500 dollarë.
Analistët e Wall Street-it kanë ulur parashikimet për shitjet e Teslës në vitin 2026, duke sinjalizuar një perspektivë më të zymtë afatshkurtër. Ndërkohë, kompani kineze si Geely, MG dhe veçanërisht BYD kanë ushtruar presion të madh mbi prodhuesit perëndimorë, duke ofruar automjete elektrike me çmime dukshëm më të ulëta. Në përpjekje për të frenuar rënien, Tesla lançoi në tetor versione më të lira të dy modeleve të saj më të shitura në SHBA.
Megjithëse BYD ka tejkaluar Teslën në volum shitjesh, kompania amerikane ka mbetur më fitimprurëse në tremujorët e fundit. Megjithatë, zgjerimi i shpejtë i BYD-së në tregje si Amerika Latine, Azia Juglindore dhe Evropa po e forcon pozicionin e saj global, edhe pse shumë vende kanë vendosur tarifa të larta për automjetet elektrike kineze. Në tetor, BYD njoftoi se Mbretëria e Bashkuar ishte bërë tregu i saj më i madh jashtë Kinës, me një rritje vjetore të shitjeve prej 880%, e nxitur kryesisht nga kërkesa për SUV-in hibrid plug-in Seal U.
Nga ana tjetër, Musk synon që gjatë dekadës së ardhshme Tesla të rrisë ndjeshëm shitjet dhe vlerën e tregut, për të përmbushur kushtet e një pakete rekord page të miratuar nga aksionarët, e cila mund të arrijë deri në 1 trilion dollarë. Strategjia e Teslës mbështetet fuqimisht te zhvillimi i automjeteve autonome, “Robotaxi”-t dhe roboti humanoid “Optimus”, me analistë që vlerësojnë se viti 2026 do të jetë vendimtar për të ardhmen e kompanisë.
Pavarësisht ngadalësimit të rritjes së BYD-së në vitin 2025 – ritmi më i dobët në pesë vjet për shkak të konkurrencës së fortë në tregun kinez – kompania mbetet një forcë dominuese globale në industrinë e automjeteve elektrike, falë çmimeve konkurruese dhe zgjerimit të shpejtë ndërkombëtar.
(Burimi: BBC)
