Shtatë herë kampionia e turneve Grand Slam në teke, Venus Williams, ka marrë një ftesё për Australian Open, turneun që nis më 18 janar në Melbourne, duke u përgatitur të shkruajë histori në tenis.
Turneu njoftoi të premten se Williams, tashmë 45 vjeçe, do të rikthehet në Melbourne Park plot 28 vjet pas paraqitjes së saj të parë atje. Në vitin 1998, ajo mposhti motrën e saj më të vogël, Serena Williams, në raundin e dytë, përpara se të eliminohej në çerekfinale nga amerikania Lindsay Davenport.
Venus kishte bërë të ditur që në nëntor se do të luante në turneun e Auckland në Zelandën e Re, gjithashtu me ftesë speciale, dy javë para Australian Open. Organizatorët konfirmuan se ajo është e regjistruar edhe për një turne tjetër në Hobart, Australi, një javë më vonë dhe pak para fillimit të ndeshjeve në Melbourne Park.
Herën e fundit që Venus Williams u shfaq në Australian Open ishte në vitin 2021. Ajo ka qenë dy herë finaliste në turneun e femrave, duke humbur të dyja herët përballë Serena Williams, në finalet e viteve 2003 dhe 2017. Rekordi i saj në Melbourne Park është 54 fitore dhe 21 humbje, ndërsa ky vit do të shënojë paraqitjen e saj të 22-të.
“Jam shumë e emocionuar që rikthehem në Australi dhe mezi pres të garoj,” tha Williams. “Kam kaq shumë kujtime të jashtëzakonshme atje dhe jam mirënjohëse për mundësinë që të kthehem në një vend që ka pasur një rëndësi kaq të madhe në karrierën time.”
Me këtë paraqitje, Venus Williams pritet të bëhet gruaja më e vjetër që ka garuar ndonjëherë në Australian Open, duke thyer rekordin e mbajtur më parë nga japonezja Kimiko Date, e cila ishte 44 vjeçe kur luajti në Melbourne Park në vitin 2015.
Në fund të dhjetorit, Williams u martua me modelin dhe aktorin me origjinë daneze Andrea Preti, në Palm Beach, Florida.
(Burimi: Associated Press)
