Një violinist që ka performuar në turne me aktorin dhe muzikantin Will Smith ka ngritur një padi në gjykatë, duke e akuzuar atë dhe një kompani menaxhimi për hakmarrje, ngacmim seksual dhe pushim të padrejtë nga puna. Padia është depozituar të martën në Gjykatën e Qarkut të Los Angeles.
Sipas dokumenteve gjyqësore, violinisti Brian King Joseph pretendon se u pushua menjëherë nga puna pasi raportoi në polici një ndërhyrje të dyshuar në dhomën e tij të hotelit gjatë turneut. Ai thotë se, ndërsa ishte larg, dikush kishte hyrë në dhomën e tij dhe kishte lënë objekte personale si peceta, një shishe birre, një çantë shpine, një shishe ilaçi për HIV-in, dokumente spitalore me emrin e një personi të panjohur dhe një shënim drejtuar atij.
Sipas padisë, incidenti ndodhi në mars 2025 në Las Vegas. Në shënim, që përfshihet si provë në padi, shkruhej se autori do të kthehej më vonë dhe i drejtohej Joseph-it në mënyrë intime. Violinisti thotë se, nga frika se personi i panjohur mund të kthehej për të kryer veprime seksuale, ai njoftoi sigurinë e hotelit dhe përfaqësuesit e ekipit të Smith-it, fotografoi sendet, kërkoi ndërrim dhome dhe raportoi ngjarjen në policinë lokale përmes një linje jo-emergjente.
Sipas padisë, siguria e hotelit nuk gjeti shenja hyrjeje me forcë dhe deklaroi se vetëm personat që kishin rezervuar dhomën kishin akses në të. Megjithatë, Joseph pretendon se në vend që të hetohej rasti, menaxheri i turneut e akuzoi atë për trillim dhe ia ndërpreu menjëherë kontratën e punës. Atij iu tha se turneu “po shkonte në një drejtim tjetër”, ndërsa pak më vonë u punësua një violinist tjetër për të zëvendësuar rolin e tij.
Padia pohon se Joseph ishte punësuar në fund të vitit 2024 për turneun “Based on a True Story: 2025” të Will Smith dhe për shfaqje të tjera. Ajo përshkruan gjithashtu një marrëdhënie të afërt mes Joseph-it dhe Smith-it përpara dhe gjatë turneut, duke pretenduar se aktori i kishte thënë në një moment se lidhja e tyre ishte “e veçantë” dhe ndryshe nga ajo me të tjerët. Joseph beson se Smith ishte i përfshirë në vendimin për ta pushuar nga puna dhe pretendon se po përgatitej për “shfrytëzim të mëtejshëm seksual”.
Avokati i Will Smith-it i ka mohuar kategorikisht akuzat. Në një deklaratë për mediat, avokati Allen B. Grodsky tha se pretendimet ndaj klientit të tij janë të rreme, të pabaza dhe të pamatura, duke shtuar se do të përdoren të gjitha mjetet ligjore për t’iu përgjigjur padisë dhe për të zbardhur të vërtetën.
Çështja mbetet në shqyrtim nga gjykata, ndërsa palët pritet të paraqesin prova të mëtejshme në javët në vijim.
(Burimi: CNN)
