Jennifer Lopez e mbylli vitin 2025 në Las Vegas, me koncertin “Up All Night”, në The Colosseum at Caesars Palace, me shfaqjen e parë më 30 dhjetor. Spektakli dyorësh përfshiu hitet e saj më të njohura, koreografi energjike dhe ndryshime të shumta kostumesh – pikërisht ajo që ka nxitur prej vitesh diskutime dhe kritika në rrjetet sociale.
Gjatë koncertit, Lopez iu drejtua drejtpërdrejt komenteve që e kritikojnë për pamjen provokuese në moshën 56-vjeçare. Ajo tha se, pas kaq shumë vitesh në skenë, ka mësuar t’i injorojë komentet negative. “Nuk do të thotë asgjë. Ua them këtë edhe fëmijëve të mi gjatë gjithë kohës,” u shpreh ajo para publikut, siç shihet në një video të publikuar në TikTok. Ajo shtoi se shpesh qesh me komentet, duke përmendur edhe kritikat për mënyrën si pozon gjithmonë me gojë hapur.
Më pas, këngëtarja ironizoi komentet për veshjet e saj: “Pse vishet gjithmonë kështu? Pse nuk vishet sipas moshës së saj? Pse është gjithmonë lakuriq?”, citoi ajo disa prej tyre. “Dhe unë i them vetes: ‘Nëse do të kishe këto të pasme, do të ishe edhe ti lakuriq’”, tha Lopez me humor, duke shkaktuar duartrokitje në sallë.
Nuk është hera e parë që artistja reagon ndaj kritikave për seksualitetin e saj në skenë. Edhe në vitin 2020, pas shfaqjes së pushimit nё Super Bowl, të cilën e ndau me Shakirёn, ajo theksoi se performanca ishte një festë e grave dhe kulturës latine dhe se nuk do të lejonte mendimet negative ta ndikonin.
Në koncertin e Las Vegasit, Lopez u shfaq në një moment edhe me dy fëmijët e saj, duke hyrë simbolikisht në vitin 2026 nga skena. Para më shumë se 4,000 spektatorëve, ajo u shpreh: “Jam në epokën time të lumturisë”.
Në një intervistë të mëparshme për El País, Lopez ka reflektuar mbi karrierën e saj 35-vjeçare dhe se si ka mësuar të mos ndikohet më nga mendimet e të tjerëve. Ajo theksoi rëndësinë e njohjes së vlerës personale dhe të mbajtjes afёr tё njerëzve besnikë e mbështetës, duke shtuar se keqkuptimet e të tjerëve nuk përcaktojnë se kush je.
(Burimi: El País)
