Tre të rinj janë arrestuar në Antwerp, Belgjikë, pasi autoritetet thanë se kanë zbuluar një komplot të dyshuar me bazë xhihadiste për të goditur figura politike — mes tyre, kryeministrin Bart De Wever — duke përdorur një dron të mbushur me eksplozivë.
Prokurorja federale Ann Fransen deklaroi për mediat se operacioni përfshiu bastisje në disa banesa në qytet, ku u gjetën një pajisje e improvizuar që nuk ishte operative, një çantë me shufra metali dhe një printer 3D që supozohej të përdorej për ndërtimin e pjesëve të dronit.
Në deklaratën për shtyp, Fransen tha se pёr ngjarjen kanё nisur hetime për “vrasje me qёllime terroriste dhe pjesëmarrje në aktivitetet e një organizate terroriste” mbetur nё tentativё. Ajo shtoi se indicie të forta tregojnë se sulmi ishte frymëzuar nga ideologji xhihadiste dhe se përdorimi i dronit ishte planifikuar si mjet për të lёshuar lёndёn shpërthyese.
Zyrtarët nuk bёnё me dije emrat e të dyshuarve, por folën për tre persona të arrestuar me vite lindjeje 2001, 2002 dhe 2007. Dy prej tyre vazhdojnë të jenë në paraburgim dhe pritet të dalin para gjykatës së hetimit, ndërsa njëri është liruar nga paraburgimi.
Ministri i Jashtëm belg, Maxime Prevot, reagoi mbi rastin duke e cilёsuar si “shokues” dhe falënderoi shërbimet e sigurisë për veprimin e tyre të shpejtë, ndërsa theksoi se kjo ngjarje rikujton që kërcënimi terrorist është real dhe kërkon vëmendje të vazhdueshme nga shteti.
Nga kjo përpjekje e frenuar pёr sulm terrorist me dron, Belgjika tregon se është përballur me një evolucion të metodave të terrorizmit — dhe që duhen përforcuar kapacitetet për të mbrojtur figura publike në një epokë ku teknologjia përdoret edhe për sulme të sofistikuara.
