Prej orës 14:00 të së martës, disa qindra studentë janё mblodhur para godinës së Ministrisë së Arsimit, duke bllokuar qarkullimin në Rrugën e Durrësit. Thirrjet që dominojnё sheshin janё të drejtpërdrejta dhe pa filtër: “Edi Rama kriminel, gjithë Shqipëria të urren!”, “Biri nënës në kurbet, biri k*rvës në pushtet!” dhe “Edi Rama terrorist!”. Protestuesit e quajtën godinën “Ministria e krimit”, ndërsa policinë “Policia e krimit”.
Në një deklaratë para tubimit, studentët thanë se kërkojnë largimin e klasës politike 35-vjeçare, sepse sipas tyre nuk ka bërë asnjë hap konkret për studentët dhe arsimin. Përveç kushteve më të mira në fakultete dhe konvikte, ata kërkuan dorëheqjen e ministres së Arsimit dhe të kryeministrit Rama.
Tensioni u rrit shpejt. Disa protestues shkulën kangjellat dhe pllakat e trotuarit, thyen xhamat e godinës dhe hodhën vezë e bojë, ndërsa u hodhën edhe flakadanë. Policia përdori gaz lotsjellës, teksa disa të rinj kaluan rrethimin dhe hynë brenda perimetrit të ministrisë. Më pas ndërhyri autoboti me ujë me presion, dhe disa protestues kanё mbetur tё plagosur nga pёrplasja me policinё.
Studentët nuk janё larguar ende. Grupe tё tjerё i janё ribashkuar perimetrit të ministrisё.
Në mes të kësaj situate, policia rrethoi hapësirën para Ministrisë së Arsimit me shiritin e verdhë të skenës së krimit, për të bërë ekspertizën. Sikur të rrethohej me të njëjtin kujdes çdo skenë e vërtetë krimi në këtë vend! Megjithёse ajo që po ndodh sot para ministrisë nuk ishte skenë krimi, por skena e pakënaqësisë së një brezi të ri që po e zvenitin duke ia vrarë shpresën.
