Prokurorja e Përgjithshme e Shteteve të Bashkuara, Pam Bondi, deklaroi se presidenti venezuelian Nicolás Maduro do të përballet së shpejti me atë që ajo e quajti “drejtësia finale amerikane”, pasi u arrestua në Venezuelë në një operacion të përbashkët të forcave speciale amerikane dhe agjentëve federalë.
Sipas burimeve të njohura me operacionin, një ekip i FBI ishte pjesë e forcave speciale të SHBA-së që realizuan kapjen e Maduros. Aktualisht, autoritetet amerikane po përgatisin transferimin e tij drejt Nju Jorkut, ku pritet të dalë përpara Gjykatës Federale të Manhatanit.
Hetimet ndaj Maduros janë zhvilluar prej vitesh nga DEA, e cila ka ndërtuar një aktakuzë të gjerë kundër tij dhe disa drejtuesve të lartë ushtarakë venezuelianë. Këto hetime pritet të përbëjnë bazën kryesore të akuzave që do të bëhen publike së shpejti.
Në një postim në rrjetet sociale në orët e para të së shtunës, Bondi konfirmoi se Maduro do të përballet me akuza serioze, përfshirë komplot për narkoterrorizëm, komplot për importim kokaine, posedim të mitralozëve dhe mjeteve shkatërruese, si dhe komplot për përdorimin e tyre kundër Shteteve të Bashkuara.
Maduro ishte kallёzuar zyrtarisht që në vitin 2020 nga Distrikti Jugor i Nju Jorkut, por deri tani vendndodhja e tij e saktë nuk kishte qenë e konfirmuar. Arrestimi i fundit shënon një kthesë të madhe në përpjekjet amerikane për ta nxjerrë atë përpara drejtësisë.
Prokurorja e Përgjithshme falënderoi gjithashtu Donald Trumpin dhe ushtrinë amerikane për, siç e quajti ajo, “misionin e jashtëzakonshëm dhe shumë të suksesshëm” për kapjen e “dy trafikantëve ndërkombëtarë të dyshuar të drogës”, duke iu referuar Maduros dhe bashkëshortes së tij.
Sipas deklaratës së Bondit, procesi gjyqësor pritet të zhvillohet në territorin amerikan, duke sinjalizuar një nga përballjet më të forta ligjore mes SHBA-së dhe udhëheqjes aktuale të Venezuelës në dekadat e fundit.
