Para se Usyk ta hidhte në tapet për herë të dytë Daniel Dubois, të ardhmen e boksit anglez, ai deklaroi se do bënte vetëm një ndeshje tjetër pas saj.
Por duket se “gjeniu” ukrainas do të vazhdojë boksin të paktën edhe tre ndeshje të tjera.
Ai i deklaroi për revistën Ring: “Mendoj se do kem edhe dy ose tre ndeshje të tjera.”
Usyk, tashmë 38 vjeç, disa muaj më parë la të kuptohej se do të kishte edhe një ndeshje boksi e më pas dëshironte t’i drejtohej MMA-së për një përplasje të kryqëzuar kundër Jake Paul, fenomenit të YouTube-it të kthyer në boksier.
Jake Paul u ndesh para pak kohe me Anthony Joshua duke humbur ndeshjen me nokaut në raundin e gjashtë, ndërsa theu edhe nofullën nga një grusht i gjigandit britanik.
Ndërkohë, Usyk hoqi dorë nga titulli i tij botëror në WBO dhe refuzoi të ndeshet me britanikun Fabio Wardley, që e rrëmbeu rripin e tij me çmimin “i përkohshëm”, titull që e fitoi pasi mundi me nokaut teknik ish-kampionin e botës, neozelandezin Joseph Parker.
Kjo vakancë e tij i dha liri mbretit ukrainas për t’u përballur me një sfidant tjetër – dhe Usyk e kërkoi ish-kampionin e botës, 39-vjeçarin amerikan Deontay Wilder. “Dua një ndeshje me Deontay Wilder.” – deklaroi në rrjetet sociale Oleksander Usyk. Menaxheri i Usyk, Egis Klimas, tregoi më pas se është në tratativa dhe bisedime me kampin e Wilder për ta zhvilluar ndeshjen në Amerikë.
Klimas deklaroi për “The National”: “Tani po punojmë për këtë ndeshje, por njëkohësisht edhe për një marrëveshje tjetër shumë-ndeshjesh për ta mbajtur Oleksandrin në ring”.
Klimas shtoi për vendin dhe kohën e ndeshjes: “Po shohim Las Vegasin ose Los Angelesin dhe datat janë fundi i prillit ose fillimi i majit”.
Me organizimin e kësaj ndeshje, Usyk do të përpiqet të zgjerojë supremacinë e tij si boksieri më i mirë i të gjitha kohërave, pasi Wilder është një nga emrat më të mirë të botës së boksit të peshave të rënda, që Usyk nuk e ka përballur asnjëherë.
Pavarësisht humbjeve që ka pësuar vitet e fundit, pas atyre me legjendarin Tyson Fury, 40-vjeçari Wilder është ende në formë të mirë fizike dhe luftëtar tepër i rrezikshëm për shkak të grushteve të tij të rënda, që ai i quan “Bomb squad”, në shqip “Skuadrilja bombarduese”.
