Kancelari gjerman Friedrich Merz ka deklaruar në Paris se Gjermania është e hapur ndaj mundësisë së një angazhimi ushtarak, duke përfshirë edhe vendosjen e trupave, por jo drejtpërdrejt në territorin ukrainas. Sipas tij, një skenar i tillë do të kufizohej “ndoshta në një vend të NATO-s pranë Ukrainës”.
Në një konferencë për shtyp në Pallatin Elize, Merz theksoi se çdo vendim përfundimtar do të merret vetëm pasi të jenë sqaruar kushtet politike dhe të sigurisë. Ai nënvizoi se “lloji dhe fushëveprimi i kontributit gjerman duhet dhe do të përcaktohen nga qeveria federale dhe parlamenti gjerman”, duke shtuar se Berlini nuk e përjashton asnjë opsion.
“Dua ta them qartë, në emër të qeverisë federale dhe timin personal: ne nuk po përjashtojmë asgjë,” u shpreh kancelari, duke lënë të hapur mundësinë e një roli më aktiv të Gjermanisë në krahun lindor të aleancës.
(Burimi: ANSA)
