Fan Noli lindi 144 vjet më parë, më 6 janar 1882. Dramaturg, klerik ortodoks, politikan, diplomat, njeri i letrave dhe muzikant, Fan Noli përkujtohet sot si një nga personalitetet më të shquara të historisë shqiptare. Ai u bë për pak kohë edhe kryeministër.
Figura e tij mbetet simbol i dijes, përkushtimit dhe emancipimit shoqëror. Vepra, mendimi dhe oratoria e tij, vijojnë të jenë referencë për brezat e rinj.
Në Lidhjen e Kombeve, me fjalimin që mbajti në Asamblenë e Pestë të Lidhjes, më 10 shtator 1924, Fan Noli mahniti mediat e kohës, që e quajtën “Bomba e Peshkopit Kryeministër të Shqipërisë”.
Tre vjet pasi vdiq Fan Noli, lindi Eduard Shalsi. Një biokimist i talentuar, i cili punoi me përkushtim si arsimtar në disa shkolla 8-vjeçare dhe të mesme të Shqipërisë. Me emigrimin në Greqi në vitet 1992–1995, ai përsosi nëpër fushat e fqinjëve tanë njohuritë mbi dezinfektuesit me fuqi të moderuar kundër baktereve, sporeve dhe viruseve.
Falë aftësive të spikatura politike, Shalsi u bë nënkryetar i Bashkisë Tiranë, ministër për Çështjet Vendore, Koordinator Kombëtar i Antikorrupsionit dhe nga viti 2009 deputet në 4 legjislatura (VII, VIII, IX dhe X).
Eduard Shalsi shquhet për thëniet që kanë mahnitur shoqërinë shqiptare.
E para në vitin 2013, kur ai deklaroi: “Mbi të gjitha, një premtim që mund ta bëjmë që tani: nuk do vjedhim në mënyrë kaq flagrante siç kanë bërë këta”.
E dyta në fund të vitit 2025, kur me libër në dorë iu drejtua publikut: “Të menduarit duhet ushqyer me lexim”.
Shalsi ka lënë gjurmë të pashlyeshme si intelektual dhe si përfaqësues i popullit shqiptar në zonat e veriut të epërm të Shqipërisë.
Dje ai kaloi nga ferma e Demush Kastratit për të vizituar 77 krerët e bagëtive të tij; pardje shpërndau certifikata mirënjohjeje për mësuesit e Tropojës dhe parsidje Shalsi inspektoi personalisht një urë që lidh Zahrishtin me Pukajn, zona të palidhura me njëra-tjetrën që prej kohës së Nolit.
Shalsi dhe Noli do mbeten dy figura të shquara, që përngjasojnë si nga pamja dhe forca e mendimit, ashtu edhe nga atdhedashuria e pakufishme për shqiptarët dhe trojet e tyre.
