Prokurori i përgjithshëm i Minesotës, Keith Ellison, njoftoi nisjen e një padie kundër qeverisë federale, duke kërkuar t’i jepet fund rritjes masive të agjentëve të ICE dhe Departamentit të Sigurisë Kombëtare (DHS) në shtet. Padia vjen pas vdekjes së Renee Nicole Good, e cila humbi jetën javën e kaluar gjatë një incidenti që përfshinte një agjent të ICE, ngjarje që shkaktoi protesta në Minesota dhe më gjerë në SHBA.
Ellison deklaroi se padia synon të ndalojë ato që ai i cilësoi si veprime federale “arbitrare dhe kapriçioze”, duke përmendur përdorim force të tepruar, arrestime pa urdhër gjykate dhe shënjestrim të institucioneve publike si gjykata, shkolla, kisha dhe vende kulti. Ai tha se mijëra agjentë federalë të armatosur janë vendosur në Minesota, duke shkaktuar mbyllje shkollash, ndërprerje të aktivitetit të bizneseve lokale dhe rritje të frikës mes qytetarëve.
“Ky është në thelb një pushtim federal i Twin Cities dhe Minesotës. Na ka bërë më pak të sigurt dhe duhet të ndalet,” u shpreh Ellison në konferencë për shtyp.
Ndihmësprokurori i përgjithshëm Brian Carter njoftoi se para padisë do të paraqitet edhe një kërkesë për urdhër të përkohshëm kufizues, për të frenuar menjëherë veprimet e agjentëve federalë në terren.
Ellison akuzoi agjentët e DHS për arrestime jokushtetuese dhe përdorim force të pajustifikuar, duke thënë se policia lokale është thirrur të ndërhyjë në rreth 20 raste ku banorë të Minneapolis kanë raportuar ndalime të papritura nga agjentë federalë. Ai shtoi se agjentët kanë hyrë me forcë në restorante dhe ambiente private, duke refuzuar të paraqesin urdhra arresti kur u është kërkuar.
Gjatë konferencës, gazetari i PBS Frontline, AC Thompson, tha se ekipi i tij ishte përballur me përdorim force nga agjentët federalë gjatë raportimit në terren. Ellison iu përgjigj duke theksuar se liria e shtypit mbrohet nga Amendamenti i Parë dhe është thelbësore në një moment kur, sipas tij, të drejtat themelore janë nën presion.
Prokurori i përgjithshëm vuri në dukje gjithashtu se popullsia emigrante jo-qytetare në Minesota përbën vetëm 1.5% të totalit — rreth gjysma e mesatares kombëtare — duke sugjeruar se shteti po shënjestrohet për arsye politike. Ai përmendi edhe sulmet mediatike dhe politike ndaj komunitetit somalez në Minesota pas rasteve të fundit të abuzimit me fondet sociale, duke shtuar: “Donald Trump duket se nuk e pëlqen shumë shtetin tonë.”
Edhe kryebashkiaku i Minneapolis, Jacob Frey, tha se prania e mijëra agjentëve federalë ka vënë në provë kapacitetin e forcave lokale të rendit. “Ne nuk e përdorim lehtë fjalën pushtim,” tha ai. “Nëse kjo do të ishte çështje sigurie, do të kishte mënyra të tjera për ta arritur.”
Ndërkohë, kryebashkiakja e Saint Paul, Kaohly Her, deklaroi se tashmë mban me vete pasaportën dhe dokumentet e identitetit gjatë gjithë kohës. “Nuk e di kur mund të më ndalojnë. Ne po ndihemi të sulmuar si qytetarë amerikanë,” u shpreh ajo.
Padia e Minesotës pritet të kthehet në një tjetër përballje të fortë mes administratës Trump dhe shteteve që kundërshtojnë politikat federale të emigracionit.
(Burimi: The Guardian)
