Një nga bashkëpunëtorët më të afërt të presidentit të Qipros, Nikos Christodoulides, ka dhënë dorëheqjen pasi një video e publikuar në rrjetet sociale duket se e tregon atë duke ofruar ndikim politik në këmbim të parave nga investitorë të huaj.
Presidenti Christodoulides konfirmoi se ka pranuar dorëheqjen e Charalambos Charalambous, Drejtor i Kabinetit dhe njëkohësisht kunati i tij. Ai e përshkroi vendimin si “një akt besimi” dhe jo si pasojë presioni apo pranimi faji.
Më herët, Charalambous kishte deklaruar në Facebook se nuk do të lejonte që posti i tij të “shndërrohej në mjet manipulimi” për të dëmtuar Qipron apo presidentin. Ai pretendoi se pamjet në video janë rezultat i “shtrembërimeve të qëllimshme” dhe “montazhit selektiv” për të krijuar përfundime të rreme dhe keqorientuese.
Videoja, e publikuar javën e kaluar, e shfaq Charalambous me një ish-ministri të energjisë dhe drejtuesin e një kompanie të madhe ndërtimi. Të tre dëgjohen duke u mburrur për marrëdhëniet e tyre të afërta me presidentin dhe aftësinë për të siguruar investime të huaja — gjë që sugjeron tregti influence.
Pamjet gjithashtu përmbajnë pretendime se Christodoulides ka tejkaluar kufirin ligjor prej 1 milion eurosh për financimin e fushatës së tij presidenciale në vitin 2023, duke marrë donacione të paregjistruara.
Akuza më e rëndë është se qeveria qipriote do të ishte e gatshme të bllokonte sanksionet e BE-së ndaj oligarkëve rusë në këmbim të financimeve nga kompani private.
Autoritetet qipriote e kanë cilësuar videon si një sulm të qëllimshëm dezinformimi me “të gjitha shenjat dalluese” të fushatave të mëparshme ruse kundër vendeve të tjera.
Shërbimet e sigurisë së Qipros kanë deklaruar se analiza fillestare e videos prej tetë minutash e gjysmë tregon “karakteristika tipike të fushatave të organizuara ruse të dezinformimit”.
Videoja u shfaq vetëm një javë pasi Qipro, një mbështetëse e fortë e presidentit ukrainas Volodymyr Zelensky, mori presidencën e radhës së Bashkimit Evropian — një fakt që ka shtuar dyshimet mbi motivet e këtij sulmi informativ.
Presidenti Christodoulides tha se BE-ja kishte paralajmëruar Qipron se gjatë presidencës së saj mund të ishte shënjestër e sulmeve hibride. Ai shtoi se vendet anëtare të BE-së dhe partnerë të tjerë ndërkombëtarë po ndihmojnë në hetimin e rastit.
“Në momente krize, një lider me duar të pastra duhet të qëndrojë i qetë. Unë jam këtu, publikisht po marr përgjegjësi. Nuk kam asgjë për të fshehur,” deklaroi ai.
Ndërkohë, partitë opozitare kanë ashpërsuar kritikat ndaj presidentit dhe qeverisë, duke thënë se videoja ka ringjallur akuzat e vjetra për korrupsion të përhapur në shtetin qipriot.
(Burimi: Euronews)
