Tesla po përballet me një tjetër padi serioze pas një aksidenti fatal ku një motoçiklist 28-vjeçar humbi jetën, ndërsa makina Model S që e goditi ishte në modalitetin “autopilot”.
Ngjarja ndodhi më 19 prill 2024 në Snohomish County, në shtetin e Uashingtonit. Jeffrey Nissen Jr., kishte ndaluar me motoçikletën e tij për shkak të trafikut, kur u përplas nga një Tesla Model S e drejtuar nga Carl Hunter. Sipas avokatëve të familjes, shoferi nuk e kuptoi menjëherë përplasjen dhe vazhdoi lëvizjen për disa metra, gjë që përkeqësoi pasojat dhe solli vdekjen fatale.
Më vonë, Hunter u tha autoriteteve se në momentin e aksidentit kishte aktivizuar autopilotin dhe se ishte shpërqendruar duke parë telefonin. Pas kësaj deklarate, ai u arrestua nën akuzën e vrasjes nga pakujdesia.
Familja e viktimës ka ngritur padi kundër Tesla-s, duke pretenduar se kompania ka qenë prej kohësh në dijeni se sistemi autopilot ka vështirësi në identifikimin e motoçikletave dhe mjeteve të vogla. Sipas tyre, Tesla ka ekzagjeruar aftësitë e sistemit dhe ka minimizuar kufizimet, duke krijuar një ndjenjë të rreme sigurie te drejtuesit.
“Tesla ka ndërtuar një sistem që fton shpërqendrimin. Shoferët besojnë se makina mund të bëjë më shumë sesa realisht është e aftë, dhe pasojat janë tragjike,” deklaroi avokati Simeon Osborn.
Nga ana tjetër, Tesla vazhdon të theksojë se autopiloti nuk e bën automjetin plotësisht autonom dhe se drejtuesi duhet të mbajë gjithmonë kontrollin e mjetit. Kompania kërkon që shoferët të kenë duart në timon dhe të jenë vazhdimisht të vëmendshëm.
Megjithatë, autoritetet amerikane kanë nisur të vënë në dyshim mënyrën se si Tesla e ka promovuar teknologjinë e saj. Së fundmi, autoriteti i automjeteve në Kaliforni vendosi se përdorimi i termave “autopilot” dhe “Full Self-Driving” në marketing ishte i gabuar dhe potencialisht mashtrues, pasi mjetet nuk janë realisht autonome.
Rasti i ri pritet të shtojë presionin mbi Tesla-n dhe industrinë e makinave me asistencë automatike, në një kohë kur debati mbi sigurinë e këtyre teknologjive po bëhet gjithnjë e më i fortë.
(Burimi: Carscoops)
