Dita e djeshme shënoi një kthesë të rëndësishme në mënyrën si do të menaxhohet sterilizimi spitalor. Pas botimit në Fletoren Zyrtare, ka hyrë në fuqi Vendimi i Këshillit të Ministrave nr. 845, datë 30.12.2025, i cili krijon shoqërinë aksionare shtetërore “Operatori i Shërbimeve të Integruara të Sterilizimit” (OSHIS sh.a.), me kapital fillestar 200 milionë lekë dhe pronësi 100% shtetërore.
Sipas vendimit, OSHIS do të marrë përsipër të gjithë procesin e sterilizimit në spitalet publike: furnizimin me sete kirurgjikale sterile, materialet njëpërdorimëshe, trajtimin e mbetjeve biologjike, menaxhimin e Stacionit Qendror të Sterilizimit në QSUT dhe digjitalizimin e gjithë procesit. Financimi fillestar do të vijë direkt nga buxheti i shtetit për vitin 2026.
Por pika më domethënëse e vendimit është neni që parashikon kalimin pa pagesë të aseteve të koncesionit ekzistues të sterilizimit tek shoqëria e re shtetërore, me pёrfundimin e kontratёs koncesionare. Pra, shteti jo vetëm që krijon një operator publik, por përgatitet të marrë në dorë aktivitetin që deri më sot ishte i dhënë me koncesion privat.
Ky zhvillim merr peshë të veçantë në kontekstin e procesit penal mbi koncesionin e sterilizimit, i cili prej vitesh ka qenë objekt kritikash për kosto të larta dhe mungesë transparence, ndërsa sot është pjesë e një procesi hetimor të hapur nga SPAK, me ish-zyrtarë të lartë të përfshirë në procedura gjyqësore dhe Ilir Beqajn nё paraburgim.
Vendimi i djeshëm për krijimin e një operatori shtetëror duket si një pranim faktik se modeli koncesionar ishte dёshtim.
Ndërsa më parë për të njëjtin shërbim janë paguar miliona euro përmes kontratёs koncesionare, sot shteti krijon një operator tërësisht publik dhe e pajis atë me një kapital fillestar prej 200 milionë lekësh, duke marrë përsipër vetë një funksion që për vite me radhë ishte deleguar tek privati.
Në këtë kontekst, vendimi i djeshëm e rëndon edhe më shumë peshën e procesit penal që lidhet me koncesionin e sterilizimit. Nëse shteti sot deklaron përmes aktit zyrtar se sterilizimi mund të realizohet drejtpërdrejt nga një operator publik me një kapital relativisht modest fillestar, kjo përforcon bindjen se skema e mëparshme ishte financiarisht “bombë” e rëndë dhe strukturalisht e pafavorshme për interesin publik. Ky realitet i ri institucional e vendos më qartë në fokus arsyen pse ajo kontratë u hetua dhe pse përgjegjësit politikë të saj ndodhen sot nën gjykim.
Nga ky moment, sfida zhvendoset tek vetë shteti. Operatori i ri publik do të administrojë një shërbim kritik për shëndetin publik dhe do të menaxhojë fonde të konsiderueshme nga buxheti dhe nga të ardhurat e veta. Kjo e bën të domosdoshme një regjim të fortë mbikëqyrjeje, transparencë reale në prokurime dhe auditim të pavarur të vazhdueshëm. Sepse në fund, ndryshimi i modelit ka kuptim vetëm nëse bashkë me të ndryshon edhe kultura e menaxhimit të parasë publike.
Në të kundërt, rreziku është që sterilizimi të mos jetë më një koncesion privat i shtrenjtë, por një monopol publik i pambikëqyrur. Dhe kjo do të ishte vetëm një formë tjetër e së njëjtës histori zhvatjeje. Njё histori e re, jo me OSHEE por me OSHIS...
