Ish-presidenti amerikan Bill Clinton dhe ish-Sekretarja e Shtetit Hillary Clinton kanë refuzuar të paraqiten për të dëshmuar në Kongres në hetimin për Jeffrey Epstein, pavarësisht kërcënimit të ligjvënësve se mund t’i shpallin fajtorë për shpërfillje të Kongresit.
Në një letër drejtuar Kryetarit republikan të Komitetit Mbikëqyrës të Dhomës së Përfaqësuesve, James Comer, çifti Clinton shkruan nё mёnyrё sfiduese:
“Do të thoni se nuk është vendimi ynë për ta marrë. Por ne e kemi marrë. Tani ju duhet të merrni vendimin tuaj.”
Comer ka vendosur afat përfundimtar për paraqitjen e tyre këtë javë, por të mërkurën deklaroi se komiteti do të mblidhet javën e ardhshme për të nisur procedurat për shpalljen e Bill Clinton në shpërfillje të Kongresit, ndërsa la të hapur mundësinë që Hillary Clinton ende mund të ndryshojë mendje.
Ky zhvillim shënon përshkallëzim të fortë politik. Nëse Dhoma e Përfaqësuesve, e kontrolluar nga republikanët, voton për shpërfillje penale të Kongresit, çështja do t’i referohet Departamentit të Drejtësisë, i cili më pas vendos nëse do të nisë procedim penal. Edhe nëse mbetet simbolik, një votim i tillë do të ishte një qortim publik ndaj familjes Clinton.
Komiteti Mbikëqyrës i ka thirrur zyrtarisht Clintonët që në gusht për intervista me dyer të mbyllura si pjesë e hetimit për Epsteinin dhe ka negociuar prej muajsh me avokatët e tyre për një datë dëshmie. Por Clintonët thonë se janë veçuar padrejtësisht, duke theksuar se shtatë persona të tjerë të thirrur janë përjashtuar nga paraqitja fizike.
Në letrat e siguruara nga CNN, Clintonët i quajnë thirrjet “të pavlefshme dhe ligjërisht të pazbatueshme”, duke deklaruar se po përballen me një sulm politik të paprecedentë.
“Çdo person duhet të vendosë kur ka parë mjaftueshёm dhe është gati të luftojë për vendin, parimet dhe njerëzit e tij, pavarësisht pasojave. Për ne, ka ardhur pikёrisht ky moment,” shkruajnë ata.
Ata shtojnë se kanë dhënë tashmë “aq informacion sa kanë”, duke theksuar se krimet e Epstein ishin të tmerrshme dhe se fokusi i Kongresit duhet të jetë pse institucionet nuk i ndaluan më herët.
Por James Comer mbetet i palëkundur. Ai ka deklaruar se Epstein ka vizituar Shtëpinë e Bardhë 17 herë gjatë presidencës së Bill Clinton dhe se Clinton ka udhëtuar rreth 27 herë me avionin privat të Epsteinit pas largimit nga detyra.
“Sipas dijenisë sime, Bill Clinton nuk ka dhënë kurrë përgjigje publike për marrëdhënien e tij me Epstein. Ne thjesht kemi pyetje,” tha Comer.
Përplasja është zhvendosur edhe në rrjetet sociale, ku Clinton ka deklaruar se qëndrimi i tij është çështje “e së drejtës dhe së gabuarës”, ndërsa Comer ka publikuar fotografi të reja të Clinton me Epstein nga dosjet e Departamentit të Drejtësisë.
Mes dokumenteve të publikuara së fundmi janë fotografi të reja: Bill Clinton pa bluzë në një xhakuzi pranë një personi identiteti i tё cilit ёshtё mbajtur i fshehtё; pamje të tij duke notuar në pishinë me Ghislaine Maxwell; dhe një foto tjetër ku Clinton qëndron me Epstein duke mbajtur nё dorё një pije. Nuk dihet saktësisht ku apo kur janë realizuar këto foto.
Epstein vdiq në vitin 2019 në burg, ndërsa priste gjyqin për akuza federale për trafikim seksual.
Bill Clinton nuk është akuzuar kurrë zyrtarisht për ndonjë shkelje penale në lidhje me Epsteinin. Zëdhënësi i tij ka deklaruar vazhdimisht se Clinton i ka ndërprerë kontaktet me Epsteinin përpara arrestimit dhe se nuk kishte dijeni për krimet e tij.
Ndërkohë, edhe demokratët në Komitetin Mbikëqyrës kanë publikuar fotografi nga rezidenca e Epsteinit, ku shfaqen figura të shumta të fuqishme politike dhe ekonomike, përfshirë edhe Bill Clinton.
Hetimi vazhdon. Dhe përballja mes Kongresit dhe familjes Clinton tani ka hyrë në fazën më të tensionuar politike dhe ligjore.
(Burimi: CNN)
