Këngëtari legjendar spanjoll Julio Iglesias është vënë në qendër të një hetimi serioz, pasi prokuroria spanjolle ka nisur shqyrtimin e akuzave për sulme seksuale dhe abuzim ndaj dy ish-punonjëseve në rezidencat e tij në Karaibe.
Sipas Zyrës së Prokurorisë së Spanjës, denoncimet lidhen me raportime mediatike që pretendojnë se dy gra, të cilat kanë punuar në rezidencat e Iglesias në Republikën Domenikane dhe Bahamas, mes janarit dhe tetorit 2021, janë viktima të sulmeve seksuale dhe fizike.
Autoritetet spanjolle konfirmuan se më 5 janar është depozituar një ankesë formale në Gjykatën Kombëtare në Madrid. Kjo gjykatë ka juridiksion të gjykojë shtetas spanjollë për krime të kryera jashtë vendit, çka do të thotë se Iglesias mund të përballet me procedura gjyqësore në Spanjë.
Organizata ndërkombëtare Women’s Link Worldwide njoftoi se përfaqëson dy gratë që kanë ngritur padinë. Sipas tyre, akuzat përfshijnë ngacmim seksual, krime kundër lirisë seksuale dhe madje edhe trafikim njerëzor për qëllime shfrytëzimi në punë dhe shërbim të detyruar.
Hetimi u publikua fillimisht nga elDiario.es dhe Univision Noticias, të cilat realizuan një raportim të përbashkët investigativ mbi çështjen.
Iglesias nuk ka reaguar ende
Deri tani, Julio Iglesias nuk ka bërë asnjë deklaratë publike mbi akuzat. Avokati i tij në Miami, Russell L. King, nuk iu përgjigj kërkesave për koment nga Associated Press.
Nga ana tjetër, prokuroria e Republikës Domenikane nuk konfirmoi nëse ka nisur hetim lokal, por sipas ligjit të vendit, çdo rast i dyshuar i dhunës seksuale duhet të hetohet, edhe pa një kallëzim formal.
Reagimi i qeverisë spanjolle
Zëdhënësja e qeverisë spanjolle, Elma Saiz, deklaroi se raportimet “kërkojnë respekt dhe seriozitet maksimal”, duke ritheksuar angazhimin e qeverisë për luftën kundër dhunës ndaj grave.
Ndërkohë, Ministri i Kulturës i Spanjës, Ernest Urtasun, tha se qeveria po shqyrton mundësinë e heqjes së Medaljes së Artë të Meritës në Arte, të cilën Iglesias e mori në vitin 2010.
“Është një çështje serioze dhe jemi të detyruar ta vlerësojmë institucionalisht,” deklaroi ministri.
Një ikonë botërore nën hije
Julio Iglesias, 82 vjeç, është një nga artistët më të suksesshëm në historinë e muzikës, me mbi 300 milionë disqe të shitura në më shumë se 12 gjuhë. Ai është babai i këngëtarit Enrique Iglesias dhe fitues i çmimit Grammy për Best Latin Pop Performance në vitin 1988, si dhe i Lifetime Achievement Award në 2019.
Tani, karriera e tij legjendare përballet me një nga sfidat më të rënda ligjore dhe morale të jetës së tij.
Hetimet janë në fazë paraprake.
Dhe opinioni publik pret përgjigje.
(Burimi: Associated Press – AP)
