Një incident i pazakontë gjatë vizitës së Donald Trump në një fabrikë të Ford në Michigan ka ndezur debat të fortë publik. Presidenti amerikan u filmua duke reaguar ashpër ndaj një punëtori që i bërtiste, ndërsa Shtëpia e Bardhë e mbrojti sjelljen e tij si një përgjigje “të përshtatshme”.
Ngjarja ndodhi të martën gjatë një vizite zyrtare në uzinën e Ford. Në një video 30-sekondëshe të publikuar nga TMZ, dëgjohet një person duke i bërtitur presidentit, ndërsa Trump shihet duke reaguar me gjeste agresive dhe duke folur me zë të lartë në drejtim të tij. Sipas TMZ, punëtori i ka bërtitur Trumpit fjalët: “mbrojtës i pedofilëve”.
Në video, Trump shihet duke i drejtuar gishtin e mesit dhe duke përsëritur frazën “vafsh në djall”. Më pas ai vazhdon ecjen nëpër fabrikë, ndërsa sigurimi ndërhyn për të larguar personin.
Drejtori i Komunikimit i Shtëpisë së Bardhë, Steven Cheung, reagoi menjëherë:
“Një i çmendur po bërtiste me fjalë të pista në një shpërthim zemërimi. Presidenti dha një përgjigje të përshtatshme dhe të qartë.”
Punëtori është identifikuar si TJ Sabula, 40 vjeç, operator në linjën e prodhimit. Ai i tha The Washington Post se ishte pikërisht ai që i bërtiti Trumpit dhe se komenti kishte lidhje me mënyrën si presidenti ka trajtuar publikisht çështjen Jeffrey Epstein. Sabula konfirmoi se është pezulluar nga puna, në pritje të një hetimi të brendshëm.
“Sa i përket kritikës ndaj tij, nuk kam asnjë keqardhje,” tha ai.
Sabula shtoi se nuk ka votuar kurrë për Trumpin, por e konsideron veten politikisht të pavarur. Ai tha se tani ndihet i “shënjestruar për hakmarrje politike” pasi, sipas tij, e ka “turpëruar Trumpin para miqve të tij”.
Nga ana tjetër, sindikata e punëtorëve reagoi duke marrë në mbrojtje anëtarin e saj. Nënkryetarja Laura Dickerson deklaroi:
“Punëtorët nuk duhet kurrë t’i nënshtrohen gjuhës ose sjelljes vulgare nga askush – përfshirë Presidentin e Shteteve të Bashkuara.”
Ford, ndërkohë, mbajti një qëndrim më neutral. Drejtori i komunikimit të kompanisë, David Tovar, tha se kompania nuk toleron gjuhë të papërshtatshme brenda ambienteve të saj, por nuk komentoi mbi rastin konkret të personelit.
Pas incidentit, në rrjetet sociale janë hapur fushata online për mbledhje fondesh për Sabula, i cili tashmë është kthyer në simbol të përplasjes mes punëtorëve dhe presidentit.
(Burimi: CNN)
