Këshilli i Lartë i Prokurorisë ka zhvilluar ditën e djeshme mbledhjen plenare ku ka miratuar disa vendimmarrje të rëndësishme për sistemin e prokurorisë.
Gjatë seancës u rikonfirmua caktimi i përkohshëm i znj. Pranvera Pustina në Prokurorinë e Përgjithshme dhe i znj. Elidjana Kasa në Prokurorinë e Apelit. Po ashtu u miratua renditja e kandidates Edlira Bako në procedurën e lëvizjes paralele për një pozicion vakant në Prokurorinë e Tiranës. Një tjetër vendim ishte transferimi përmes lëvizjes paralele i prokuroreve Vasiana Postol dhe Jonida Allushi në Prokurorinë e Elbasanit.
Por vendimi që ka shkaktuar reagimin më të fortë publik është transferimi i prokurores Vasiana Postol në Prokurorinë e Elbasanit. Postol ka qenë prokurorja e çështjes së vrasjes së të riut Egli Proga në Pogradec, një ngjarje që tronditi opinionin publik.
Sapo ngjarja ndodhi, u deklarua se Egli kishte humbur jetën pasi ishte rrëzuar në gjendje të dehur, ndërsa më vonë doli se ai ishte goditur me grusht nga autori dhe kishte ndërruar jetë si pasojë e asaj goditjeje. Hetimet e mëtejshme pas largimit të kësaj prokuroreje nga çështja dhe pas këmbënguljes së familjarëve të Egli Progës, zbuluan se pas ngjarjes qëndronte një grup i organizuar gjobëvënësish që e kishin dhunuar Eglin për t’i marrë para. Sot, pjesëtarët e këtij grupi janë të lirë, fakt që ka shtuar edhe më shumë indinjatën e familjes.
Menjëherë pas publikimit të vendimit të KLP-së, ka reaguar motra e të ndjerit Egli Proga, e cila në një postim të fortë shkruan:
“Bravo KLP – krenaria e prokurorit e vendit tonë! Për punë të përkryer e promovuat prokuroren e vëllait tim nga Korça në Elbasan. Pse nuk e sollët në Tiranë më mirë? Faleminderit Prof. Mirela! Po të masakrohej vëllai yt nga kriminelët e gjobaxhinjtë, a do e dekorojë prokuroren që tha ‘vdiq nga një grusht’? Faleminderit të gjithë anëtarëve të KLP që mbyllni sytë sa herë votoni, për të mos parë ç’keni para!”
Vendimet e djeshme të KLP-së kanë rihapur debatin mbi mënyrën si vlerësohen dhe promovohen prokurorët në Shqipëri, sidomos kur bëhet fjalë për çështje që kanë tronditur opinionin publik dhe familje që ende kërkojnë drejtësi.
Në fund, pyetja e motrës së Egli Progës mbetet e hapur përballë gjithë sistemit: A sheh vërtet KLP atë që ka përpara kur voton, apo i mbyll sytë?
