Lideri suprem i Iranit, Ayatollah Ali Khamenei, ka akuzuar Shtetet e Bashkuara dhe Izraelin se qëndrojnë pas dhunës gjatë protestave të fundit antiqeveritare në vend, duke pretenduar se “aktorë të lidhur me SHBA-në dhe Izraelin shkaktuan dëme masive dhe vranë disa mijëra njerëz”.
Në një fjalim të mbajtur të shtunën, Khamenei tha se trazirat që përfshinë Iranin për më shumë se dy javë ishin të nxitura nga jashtë, duke e cilësuar presidentin amerikan Donald Trump si “kriminel” dhe duke pretenduar se këtë herë përfshirja amerikane ishte më e drejtpërdrejtë se në protestat e mëparshme.
Sipas mediave shtetërore iraniane, Khamenei deklaroi se ndërsa Irani nuk do ta zgjerojë konfliktin përtej kufijve të tij, personat që ai i konsideron përgjegjës “nuk do të mbeten të pandëshkuar”. “Ne nuk do ta fusim vendin në luftë, por nuk do të lejojmë që kriminelët e brendshëm apo ndërkombëtarë të shpëtojnë pa pasoja,” tha ai.
Autoritetet iraniane kanë akuzuar vazhdimisht fuqitë e huaja, veçanërisht SHBA-në dhe Izraelin, për nxitjen e protestave dhe për drejtimin e operacioneve në terren.
Korrespondenti i Al Jazeera-s, Resul Serdar Atas, raportoi nga Teherani se deklarata e Khameneit përsërit qëndrimin tradicional të Iranit, por sjell një element të ri: për herë të parë, lideri suprem foli për një bilanc viktimash në mijëra. Ai tha se “protestuesit e dhunshëm” kanë vrarë mijëra persona, megjithëse ende nuk ka një shifër zyrtare të konfirmuar.
Organizata për të drejtat e njeriut me bazë në SHBA, HRANA, ka raportuar gjithashtu se rreth 3,000 persona mund të jenë vrarë gjatë protestave. Deri tani, autoritetet iraniane kishin pranuar publikisht vetëm qindra viktima, përfshirë pjesëtarë të forcave të sigurisë.
Khamenei akuzoi protestuesit edhe për shkatërrime të mëdha, duke pretenduar se janë djegur mbi 250 xhami dhe qendra shёndetёsore.
Sipas versionit zyrtar iranian, protestat nisën fillimisht si tubime paqësore kundër rritjes së çmimeve dhe vështirësive ekonomike më 28 dhjetor, por më pas u “rrëmbyen nga grupe të dhunshme të mbështetura nga jashtë”.
Ndërkohë, nga burime tё pakonfirmuara deklarohet se shërbimi i mesazheve SMS është rikthyer në të gjithë vendin, si pjesë e heqjes graduale të bllokimit të internetit, pas tetë ditësh ndërprerje pothuajse totale të rrjetit.
(Burimi: Al Jazeera)
