Teksa politikanët britanikë vazhdojnë debatet për sigurinë e fëmijëve në internet, një nënë e thyer nga dhimbja ka vendosur ta çojë betejën deri në Shtetet e Bashkuara.
Ellen Roome beson se djali i saj, Jools Sweeney, vetëm 14 vjeç, humbi jetën pasi u përfshi në një të ashtuquajtur “blackout challenge” të përhapur në TikTok. Tani ajo është një nga 4 prindërit e parë britanikë që po padisin një kompani rrjetesh sociale për vdekjen e fëmijëve të tyre.
“Blackout challenge” është një sfidë e rrezikshme që ka qarkulluar herë pas here në rrjetet sociale, ku të rinjtë nxiten të mbajnё përkohësisht frymёn për të provuar një ndjesi të shkurtër marramendjeje, ndërsa e regjistrojnë veten me video. Kjo praktikë mund të shkaktojë humbje ndjenjash, dëmtime serioze shëndetësore dhe, në raste ekstreme, humbje jete. Ekspertët e shëndetit dhe sigurisë së fëmijëve kanë paralajmëruar vazhdimisht se sfida të tilla janë jashtëzakonisht të rrezikshme dhe nuk duhet asnjëherë të imitohen apo normalizohen në rrjetet sociale.
TikTok, sipas Ellen, nuk i ka dhënë akses në të dhënat e llogarisë së të birit, të cilat mund të ndihmonin për të kuptuar çfarë ndodhi në orët e fundit të jetës së tij. Nëse gjykata amerikane vendos në favor të familjeve, platforma do të detyrohet të dorëzojë këto të dhëna.
Ndërkohë, policia britanike ka hapur sërish hetimet për rastin, pas informacioneve të reja të mbledhura nga vetë Ellen, e cila madje ka shitur biznesin e saj për të financuar kërkimin e së vërtetës pёrmes hetuesve privatё.
Ajo ka ndёrmarrё gjithashtu nismёn për miratimin e të ashtuquajturit “Ligji i Jools”, i cili do t’i detyronte kompanitë e teknologjisë të ruajnë dhe dorëzojnë automatikisht të dhënat e një fëmije në rast vdekjeje të dyshimtë.
“Gjithçka që kam kërkuar është e vërteta,” thotë ajo. “Nëse ky ligj ekziston, kompanitë nuk do të mund të fshijnë gjurmët.”
Rasti i Jools nuk është i vetmi. Tre familje të tjera britanike i janë bashkuar padisë kolektive, duke pretenduar se algoritmet e rrjeteve sociale u kanë shpërndarë fëmijëve të tyre përmbajtje të rrezikshme.
Avokatët e familjeve argumentojnë se platformat nuk janë thjesht vende ku ngarkohet përmbajtje, por sisteme që e përhapin atë në mënyrë aktive – dhe për këtë arsye mbajnë përgjegjësi.
Nga ana tjetër, TikTok deklaron se ndalon përmbajtjet e rrezikshme dhe se shumica e tyre hiqen para se të raportohen. Por për prindërit, kjo nuk mjafton.
“Nevojiten rregulla tё vёrteta. Nëse një produkt është i rrezikshëm, hiqet nga tregu. E njëjta gjë duhet të vlejë për rrjetet sociale,” thotë Ellen.
Ajo beson se kompanitë e mëdha të teknologjisë po tallen me ta, ndërsa prindërit përpiqen të mbrojnë fëmijët e tyre në një botë digjitale që ecën më shpejt se ligjet.
(Burimi: The Sun)
